A pílula poscoital evita máis do 90% dos embarazos non desexados naquelas mulleres que recorren a esta anticoncepción de urxencia tras manter unha relación sexual non protexida, aínda que non sexa o mellor método dispoñible e debe ser a última opción.
Así o manifestou este mércores a presidenta da Sociedade Española de Contracepción (SEC), Esther de la Viuda durante a presentación do 10º Encontro Nacional de Saúde e Medicamento da Muller que se celebrará ata o vindeiro venres.
De la Viúda explica a RTVE.es que o que fan estes anticonceptivos de urxencia é inhibir a ovulación de forma que se esta xa se produciu non poden evitar o embarazo, que sería o caso do 10% restante dos casos.
Desde o pasado mes de setembro, a pílula poscoital véndese sen receita médica nas farmacias españolas. A medida, anunciada polo Ministerio de Sanidade en maio, foi criticada no seu momento polo Partido Popular e os grupos provida.
A presidenta da SEC asegurou, con todo, que facilitar o seu acceso "non incrementa as condutas de risco, non fai que se cambie a métodos anticonceptivos menos eficaces e, incluso, no uso repetido, que é un mal uso, non é unha bomba hormonal".
Segundo De la Viuda, da poboación fértil española (uns 11,7 millóns de mulleres), aproximadamente dous millóns estarían en risco de embarazo non desexado por non utilizar anticonceptivos eficaces.
Preguntada sobre se a nova Lei do Aborto vai incrementar o número de interrupcións de embarazos non desexados, a doutora De la Viuda asegurou que non e recordou que naqueles países que carecen de regulación "movémonos no aborto clandestino e no turismo abortivo". No Encontro púxose de relevo que o preservativo segue tendo a taxa de uso máis alta en España e é o método máis utilizado no 37,7% das mulleres, seguido da anticoncepción hormonal combinada (22%).
Combinar o preservativo e a pílula
A este respecto, a presidenta da SEC defendeu o uso do dobre método (naceu en Holanda), que consiste na utilización conxunta dun anticonceptivo hormonal e o preservativo, xa que en España apenas o utilizan "un miserable un 1,5%" da poboación". Contra os "falsos mitos" que sinalan que os anticonceptivos hormonais producen cancro, a doutora De la Viuda incidiu no efecto preventivo destes fármacos fronte aos tumores de ovario e de endometrio.
"O risco que ten unha muller que utiliza un anticonceptivo hormonal de padecer un cancro xinecolóxico é menor que o que ten unha muller que non o utilizou nunca", subliñou. Neste sentido, o doutor Palacios denunciou que os prospectos "non están ben feitos moitas veces", xa que "prefiren esaxerar". "É unha tradición histórica", sinalou.
