Johnny Depp e Amber Heard alcanzan un acordo de divorcio

Os actores Johnny Depp e Amber Heard alcanzaron un acordo de divorcio despois de que a actriz retirase a petición dunha orde de afastamento por violencia doméstica contra o seu xa exmarido, asegurou o portal TMZ, especializado en información sobre famosos.

O acordo extraxudicial establece que Depp pagará sete millóns de dólares a Heard e chega un día antes do comezo do xuízo que estaba previsto nun xulgado dos Ánxeles.

Nun comunicado conxunto, citado por TMZ, Depp e Heard afirman que a súa relación foi "intensamente apaixonada" e "ás veces inestable", pero sinalaron que sempre estivo "unida polo amor".

A nota engade que "ningunha parte fixo acusacións falsas" para obter rendemento económico, e sinalou que "nunca houbo intentos de dano físico ou emocional".

"Amber deséxalle o mellor a Johnny no futuro. Amber doará ganancias do divorcio á caridade", di o comunicado, sen máis detalles.
Amber Heard presentou o 23 de maio unha demanda de divorcio de Johnny Depp, con quen se casou en febreiro de 2015, por "diferenzas irreconciliables".

Dous días despois, a actriz acusou á súa exparella de reiterada violencia doméstica e presentouse ante un xuíz cun negrón no cara produto, presuntamente, dos abusos físicos de Depp.

Ademais, afirmou ser vítima deses ataques de forma "repetida" durante os 15 meses que durou o matrimonio e mostrou varias fotografías que así o testemuñaban.

Tras estas acusacións, un xuíz dos Ánxeles aprobou unha orde de afastamento temporal que solicitara Heard contra Depp, á espera da vista na que se resolvería definitivamente o caso.

Así mesmo, a pasada semana filtrouse un vídeo no que aparece o actor gritando e con actitude agresiva coa súa entón muller.

Finalmente, o acordo de divorcio incluíu a retirada da petición da orde de afastamento, o que supón o peche dun caso xudicial que atraeu unha gran atención mediática en Estados Unidos.