Jenaro Castro estrea este venres o programa de entrevistas Plano general en La 2 de TVE. O primeiro invitado será o exvicepresidente do Goberno e antigo líder de Podemos Pablo Iglesias. "Que entrevista non esperaría o persoal de Jenaro Castro na estrea dun programa?", pregúntase retoricamente o xornalista nacido en Pol en 1961.
"Teño unha relación excelente con Pablo Iglesias, outra cousa é que teñamos distintas filosofías da vida, por dicilo dalgún xeito", remarca. O expolítico participará nun espazo de media hora que se emitirá ás 21.25 horas do venres. Plano general está estruturado en cinco seccións, "para darlle ritmo".
"Comezará co apartado A descrición para explicar quen é o personaxe, que non sempre serán tan coñecidos", indica Jenaro Castro. O primeiro programa terá como gancho o lanzamento do libro que protagoniza Pablo Iglesias, Verdades a la cara. Recuerdos de los años salvajes, que recolle conversas con Aitor Rivero e sairá o vindeiro martes, día 12.
O autor da obra trazará a biografía do antigo dirixente de Podemos, que hai tempo que non se somete a un cuestionario alleo. "Expliqueille o proxecto a Pablo Iglesias e díxome que non sabía se o tería que pensar porque quita libro o día 12. É a primeira entrevista que concede en moito tempo".
"Pablo Iglesias dixo que era máis feliz fóra do poder", avanza Castro
Sala de prensa atenderá a actualidade informativa, "sen ser escravos". "No caso de Iglesias falamos de Ucraína, Putin, Sánchez, Dina Bousselham, Mariló Montero ou Garzón", adianta.
Na seguinte sección, Nun recuncho da alma, no que se busca un enfoque máis persoal, o primeiro invitado confésase "sobre a familia e o seu estado de ánimo". E agrega: "Dixo que era máis feliz fóra do poder".
Primeiro plano é un apartado de preguntas breves. Pablo Iglesias contesta se prefire ser denominado "bolivariano, populista ou comunista" ou sobre se é máis "do barrio de Salamanca, de Vallecas ou de Galapagar", que son tres distritos madrileños.
A media hora de Plano general péchase co apartado O muro, na que o entrevistado asina unha frase que defina o seu pensamento e que se destina a un muro virtual do espazo.
O invitado elixe a música que vai soar e o lugar no que se desenvolverá a gravación. "Pablo Iglesias escolleu o estudo onde fai o seu podcast, La base", apunta o xornalista lucense, que xa avanza que o filósofo Fernando Savater optou polo hipódromo da Zarzuela, "pola súa afección aos cabalos".
Antes que o pensador vasco, a artista Chanel contestará as preguntas de Jenaro Castro na segunda entrega. "É coñecida por Eurovisión, pero ten un carreirón en musicais da Gran Vía de Madrid". Como anécdota, o xornalista de Pol comentou que a artista "ten familia en Galicia e usa moito a palabra depende".
O equipo está formado por profesionais "con moita experiencia e traxectoria" que xa traballaron con Jenaro Castro
Logo de Savater, pasarán
O espazo redifundirase os domingos ás 06.30 horas na 1, Canle 24 Horas e TVE Internacional, e pódese volver ver na plataforma RTVE Play.
Plano general é un produto dos Servizos Informativos de RTVE, "integramente de produción propia". O equipo está formado por profesionais "con moita experiencia e traxectoria" que xa traballaron con Jenaro Castro.
O lucense define o programa como "sinxelo, que son os que funcionan, e sincero". Engade que é "modesto, porque está feito cos medios de TVE, cun equipo reducido e experimentado".
O obxectivo principal de Plano general é entrevistar personaxes relevantes de diferentes ámbitos. Poida que a actualidade entre na escaleta, "aínda que non é un condicionante indispensable".
