Jay Z, Beyoncé e Madonna dan a coñecer Tidal, a súa alternativa a Spotify

Os artistas tomaron a iniciativa para solucionar a crise do modelo de negocio na industria da música e  Jay Z convocou en Nova York a Madonna, Rihanna, Beyoncé e Alicia Keys, entre outros, para presentar Tidal, unha plataforma de música en 'streaming' que planta cara a Spotify.

Mentres a industria aínda se lamenta pola morte do CD e os consumidores aínda recorren con frecuencia ao pirateo para conseguir as cancións máis escoitadas, esta vez foron os artistas, que ultimamente parecen condenados a centrar os seus beneficios nas xiras de concertos e non nas vendas de álbums, o que decidiron pór en funcionamento a súa alternativa a un e outro modelo.

Jaz Z é o cerebro da operación que se chamou Tidal e que ofrece, por 19,99 dólares ao mes, un servizo de 25 millóns de cancións sen anuncios, 75.000 vídeos musicais, identificador de melodías, xestor de redes sociais e listas de reprodución.

Todo iso, compatible con case todos os sistemas operativos de teléfonos móbiles e ordenadores, estará dispoñible en 31 países e promete unha calidade de son superior aos seus competidores, aínda que tamén se ofrece unha opción por 9,99 dólares para aqueles que queiran un son de calidade convencional. É dicir, á batalla directa a Spotify (plataforma que foi explicitamente rexeitada por artistas como Taylor Swift) engade competencia indirecta con Youtube na cuestión de vídeos, as redes sociais en cuestión de proximidade cos artistas e a Shazam no recoñecemento de cancións que soan en radio ou televisión.

O famoso rapeiro e visionario produtor conseguiu, ademais de crear este proxecto, reunir nunha mesma sala e cunha puntualidade británica (ás 5 da tarde de Nova York (22.00 GMT) aos astros musicais con axendas máis apertadas do mundo. Madonna, Rihanna, Beyoncé, Daft Pank, Alicia Keys, dous membros de Arcade Fire, Jack White, Kanye West, Nicky Minaj e Usher, entre outros, asinaron o manifesto inicial desta proposta e, por videoconferencia, Chris Martin e Calvin Harris seguiron o momento histórico.

"Temos que escribir a historia por nós mesmos", di Jay Z no vídeo promocional. "Se estes artistas puideron sentar nunha habitación xuntos, o mundo pode cambiar. E iso pasou hoxe", engade.

En xaneiro, Jay Z comprou Tidal á compañía sueca Aspiro por 56 millóns de dólares e, desde entón, estivo dándolle a volta á plataforma para adaptala a este modelo de negocio, que se suma a un sector, o da música en 'streaming'" (escoita directa sen descarga) que, segundo a Asociación da Industria de Gravación de Estados Unidos está valorada en 1.800 millóns de dólares. Segundo o New York Times, Spotify ten agora mesmo 60 millóns de usuarios en todo o mundo, dos cales 15 millóns pagan a subscrición e os outros utilizan o servizo gratuíto con publicidade. Prevese que Apple tamén ofreza o seu servizo de música en 'streaming' ao longo deste ano.