As infantas non cumpren cos requisitos para ser vacinadas en Emiratos Árabes

As infantas Elena e Cristina non cumprirían, a priori, coas normas de vacinación vixentes en Emiratos Árabes Unidos, onde na actualidade están dispoñibles catro das vacinas contra o covid-19, a chinesa Sinopharm, a rusa Sputnik V, a de Pfizer-BioNTech e a de AstraZeneca. 

Segundo informa o Goberno emiratí na súa páxina web, as vacinas están dispoñibles de forma gratuíta para os cidadáns e residentes que por motivos médicos así se considere, para o que hai unha lista de grupos prioritarios. 

Así, as vacinas administraranse con carácter prioritario e sen necesidade de cita previa aos cidadáns emiratíes e os seus empregados do fogar –estes adoitan ser maioritariamente estranxeiros–; cidadáns e residentes de máis de 60 anos –apartado no que entraría Don Juan Carlos, quen se cre que xa está vacinado–, persoas con discapacidade, persoas con enfermidades crónicas e traballadores do sistema sanitario e do educativo. Ademais, pagar por recibir as doses está considerado ilegal.

A XUSTIFICACIÓN. Tras a polémica desatada, a infanta Elena acudiu este mércores ao palacio da Zarzuela para visitar á súa nai, a raíña Dona Sofía. 

"Tanto a miña irmá coma min acudimos a visitar ao noso pai e co obxecto de ter un pasaporte sanitario que nos permitise facelo regularmente, ofrecéusenos a posibilidade de vacinarnos, ao que accedemos", explicou. 

"De non ser por esta circunstancia accederiamos á quenda de vacinación en España, cando nos correspondeu", asegurou Dona Elena, saíndo ao paso así da polémica suscitada polo feito de que ela e a súa irmá non esperen para ser vacinadas aquí.  

TURISMO DE VACINA. Esta polémica deu visibilidade ao fenómeno do turismo de vacinas, un negocio que se está pondo en boga para os máis podentes.

Cuba, por exemplo, converteu a vacina nun reclamo turístico e o Goberno asegura que os turistas que cheguen ao país terán a opción de recibir a vacina Soberana 2.

Tamén ocorreu en Florida un fenómeno similar. Unhas 50.000persoas viaxaron ao estado desde outros puntos do país ou o estranxeiro para recibir a vacina, xa que alí o soro é gratuíto para maiores de 65 anos.

E a axencia Knightsbridge tamén está a organizar paquetes a India, onde, segundo de The Telegraph, dispoñen da vacina Oxford/ AstraZeneca, que se vende a 1.000 rupias (11,3 euros) no mercado privado.