O produtor de cine Harvey Weinstein pediu este mércores ao Tribunal Superior de Los Ángeles (EE UU) que desestime a demanda que a actriz Ashley Judd presentou contra el en abril e na que, entre outros delitos, o acusaba de acoso sexual e difamación.
O medio especializado The Hollywood Reporter detallou este mércores os argumentos que Phyllis Kupferstein, avogada de Weinstein, presentou no tribunal californiano para defender o produtor, que, doutra banda, está a ser xulgado en Nova York por seis cargos relacionados con agresións sexuais.
Segundo o relato de Judd, Weinstein intentou excederse durante un encontro de negocios que tivo lugar nun hotel de Beverly Hills (California, EE.UU.) entre finais de 1996 e principios de 1997. Ante a negativa de Judd, Weinstein comezou presuntamente unha campaña de difamación en Hollywood para impedir que tivese acceso a papeis importantes en, por exemplo, as películas de O señor dos aneis, que dirixiu Peter Jackson.
Wenstein defendeu que a intérprete esperou demasiados anos para presentar a denuncia
Como resposta a estas acusacións, Weinstein defendeu este mércores que a intérprete esperou demasiados anos para presentar a súa denuncia. "A demandante certamente soubo do suposto acoso sexual e os seus traumas, se os houbo, no momento do encontro no hotel", afirmou. "Ela soubo ademais que non fora seleccionada para O señor dos aneis para cando comezou a rodaxe", engadiu sobre unha triloxía cuxa primeira película, O señor dos aneis: a Comunidade do anel, estreouse en 2001.
"Judd afirma que non soubo ata o final de 2017 que Weinstein estaba supostamente detrás da decisión do casting. Con todo, admite que non investigou por que non fora seleccionada porque non quería molestar a Jackson. En consecuencia, a súa falta á hora de presentar unha demanda a tempo débese á súa propia omisión de dilixencia razoable e non a unha mala conduta de Weinstein", dixo.
A avogada de Weinstein tamén cuestionou a acusación de acoso sexual porque, na súa opinión, Judd non argumentou que o trato do produtor fose "grave ou dominante, especialmente dado que a demandante alegou que foi un feito illado e que Weinstein e ela, en palabras da denunciante, negociaron acerca da súa futura actividade sexual". Este argumento refírese ao episodio de presunto acoso sexual que describe Judd na demanda.
A actriz acudiu a unha reunión con Weinstein, que a recibiu en albornoz e lle pediu que lle dese unha masaxe, ao que Judd se negou. Tamén lle pediu que o axudase a elixir a súa roupa e que vise como se duchaba, dúas proposicións que rexeitou así mesmo a actriz. Asustada e crendo que ía sufrir algún tipo de agresión, Judd expuxo, segundo as súas palabras, un "simulacro de negociación" para escapar da situación e baixo o que propuxo a Weinstein, falsamente, que deixaría que a tocase cando gañase un Oscar por un dos seus filmes. "Weinstein respondeu: Cando sexas nomeada". Judd mantívose firme e dixo: "Non, cando gañe". E entón fuxiu do lugar, asegura a demanda.
Weinstein, en cambio, sostén que se trataba dunha negociación real. Por parte da actriz, o avogado Theodore Boutrous cualificou os argumentos de Weinstein de "infundados" e "ofensivos". Ademais, asegurou que demostrarán nos tribunais que Weinstein "prexudicou maliciosamente" a carreira de Judd cando ela rexeitou as súas proposicións sexuais.
