'Gran Hermano' estrea este xoves a súa 17 edición con grandes novidades tecnolóxicas

Gran Hermano 17  estréase este xoves en Telecinco con Jorge Javier Vázquez como novo presentador, nunha edición que tamén contará con importantes novidades tecnolóxicas para sorprender á audiencia, cambios na imaxe do programa e na casa, así como unha maior cobertura en redes sociais.

Jorge Javier Vázquez debutará mañá á fronte de Gran Hermano nesta decimoséptima edición, na que encabezará a terna de presentadores formada por Jordi González, á fronte de GH: o debate, e Lara Álvarez, enviada especial á casa de Guadalix de la Sierra (Madrid) en GH: Límite 48 horas.

Ao programa chegan tamén os últimos avances en emisión en directo, que fusionan contornas virtuais e reais ao incorporar solucións gráficas en vivo, unha revolución tecnolóxica coa que esperan sorprender á audiencia, informa Mediaset nunha nota.

Para iso, as instalacións da casa de Guadalix de la Sierra foron dotadas de novas infraestruturas e equipamentos, con preto de 100 posicións de cámara e 75 micrófonos para seguir aos participantes acotío.

O logo do programa, así mesmo, renóvase para ser agora un ollo de cores, en consonancia coa nova imaxe da casa, na que destaca o seu renovado xardín, que será máis luminoso e converterase no centro da vida dos 17 concursantes.

MAIOR COBERTURA. Este ano, Mediaset completará a súa cobertura do evento en televisión a través de Telecinco e Divinity; en internet nas páxinas web da canle, Mitele.es e Radioset.es; na aplicación oficial do concurso, que volverá fomentar o contacto directo e a interactividade cos seus seguidores, e nas redes sociais.

Tras concluír a anterior tempada cos seus mellores rexistros de audiencia nas últimas cinco edicións, cun 23,1 % de cota de pantalla e 2,8 millóns de espectadores, o inicio da nova edición de Gran Hermano conclúe o proceso de selección ao que se presentaron máis de 13.000 candidatos.

Este formato, producido en España por Telecinco en colaboración con Zeppelin TV, converteuse no referente da telerrealidade a nivel mundial e conta xa con 268 edicións emitidas en 50 países do mundo.