A caza do lobo quedará prohibida en toda España antes do 25 de setembro

Explora habilitar un pago adicional ao pastoreo extensivo en zonas de convivencia de grandes carnívoros
Galicia cuenta con una población de lobo de unas 90 manadas, lo que se traduce en 600-800 ejemplares. AEP
photo_camera Dous lobos. ARQUIVO

O lobo deixará de ser especie cinexética antes do 25 de setembro deste ano, tras a publicación este mércores dun proxecto da orde ministerial que modificará a Listaxe de Especies Silvestres en Réxime de Protección Especial (Lespre) co fin de incluír todas as poboacións de lobo ibérico de España. Ese proxecto do Ministerio para a Transición Ecolóxica (Miteco) someterase agora a información pública durante 20 días e establecerá un calendario transitorio ata que a Conferencia Sectorial aprobe a futura Estratexia Estatal do Lobo nos próximos meses. 

Segundo o previsto na norma, "o lobo deixará de ser especie cinexética en data non posterior ao 25 de setembro de 2021", segundo un comunicado do ministerio. A orde amplía a todos os núcleos da poboación lobeira de España o status de protección especial que prohibe a súa caza en todo o territorio, e reverte deste xeito a condición de especie cinexética que ata agora mantiña ao norte do Douro. 

No entanto, segundo o comunicado, o texto determina que mentres non se dispoña da "Estratexia Estatal do Lobo" poderanse seguir aplicando as medidas establecidas polas comunidades autónomas para o manexo das súas poboacións de lobos. Fíxase así "un calendario transitorio" ata que a Conferencia Sectorial aprobe a Estratexia Estatal do Lobo, "non máis tarde do 25 de setembro", segundo o secretario de Estado de Medio Ambiente, Hugo Morán. Desde ese momento, "todas as comunidades deberán ter as súas ferramentas de xestión vinculadas á especie adaptadas á nova situación".

A proposta de inclusión do lobo no Lespre foi aprobada pola Comisión Estatal para o Patrimonio Natural e da Biodiversidade o pasado 4 de febreiro e, ademais de prohibir a súa caza, o acordo incluía o compromiso de reforzar as tarefas de seguimento e a adopción de medidas para mellorar a cohabitación coas actividades de gandería extensiva e outras no ámbito rural.

O ministerio coordina os traballos de preparación dun novo censo nacional de lobo, de maneira que poida actualizarse o número de mandas en 2021 e 2022 cos métodos máis avanzados e precisos de cuantificación. Así mesmo, en colaboración con outras unidades, explora novas liñas de financiamento para habilitar un pago suplementario adicional ao pastoreo extensivo en zonas de convivencia de grandes carnívoros como contrapartida por servizos ambientais, así como axudas para protección do gando en zonas con presenza de lobo que eviten ataques ou reduzan a probabilidade de depredacións.

Comentarios