Dorotea Bárcena, que logrou gran popularidade no programa dos 'Tonechos' na Televisión de Galicia co seu papel de sogra de Roberto Vilar, chamábase en realidade Adoración Sánchez Bárcena e nacera en Oviedo o 9 de xullo de 1944, polo que contaba con 72 anos.
Diplomada en maxisterio, abandonou pronto os labores docentes en Vigo para dedicarse ao teatro na súa dobre condición de directora teatral e actriz. Foi directora do Centro Dramático Galego, creou a compañía Teatro da Lúa, actuou con algúns dos principais actores e actrices do panorama galego e nacional e logrou gran popularidade polos seus papeis no cine e fundamentalmente na televisión.
A súa morte, este 22 de novembro, causou sorpresa, aínda que os seus compañeiros de profesión eran conscientes de que o seu estado de saúde era delicado desde hai tempo.
