O actor Enrique San Francisco acudirá ao XIII Festival de Cans, o certame de cine que se celebra no pequeno núcleo do Porriño, para presentar a longametraxe de animación Psiconautas, no que presta a súa voz para un dos personaxes principais, e colocará a súa estrela no Torreiro de Cans.
Trátase dunha honra que en anteriores edicións tiveron Luís Tosar, Javier Gutiérrez ou Isabel Coixet.
Ademais, San Francisco estará presente na procesión de chimpíns da considerada festa do agroglamour, que se celebrará a parroquia porriense de Cans do 18 ao 21 deste mes.
En Psiconautas, o actor presta a súa voz para unha historia de animación dirixida a adultos na que os protagonistas intentan escapar do asfixiante ambiente da illa na que viven, un lugar que perdeu todo o seu esplendor por mor dun terrible accidente industrial.
Tras obter o premio Lurra, que concede o Festival de San Sebastián, a película recibiu a semana pasada un galardón do Festival de Animación de Stuttgart e, o próximo mes de xuño, estará presente no Festival Internacional de Cine de Animación de Annecy con opción a galardóns.
O Coloquio na leira estará protagonizado este ano polo cineasta monfortino Dani de la Torre e a produtora coruñesa Emma Lustres, que falarán do seu traballo na película O descoñecido, na que colaboraron ambos.
Tras esgotar as entradas dispoñibles a través de internet, o festival ofrecerá este venres ás 19.00 horas no Torreiro de Cans as últimas cen entradas para acudir á proxección das curtametraxes que irán a concurso.
