O polifacético creador surafricano William Kentridge (Xoannesburgo, 1955), coñecido polos seus debuxos, pinturas, gravados, collages, esculturas e fotografías, pero tamén polas súas incursións no teatro, a ópera e a música, foi distinguido este xoves en Oviedo co Premio Princesa de Asturias das Artes 2017.
Segundo o xurado, trátase "dun dos artistas máis completos e innovadoras do panorama internacional", e ademais destaca por estar "profundamente comprometido coa realidade".
A candidatura deste artista comprometido social e politicamente impúxose entre as 43 procedentes de 19 países que nesta ocasión optaban a este galardón, o primeiro dos oito que anualmente concede a Fundación Princesa de Asturias. A súa candidatura fora proposta por Beningno Pendás García, membro do xurado do Premio Princesa de Comunicación e Humanidades 2017, e Raquel García Guijarro, xerente do Centro de Estudos Políticos e Constitucionais.
Entre o xurado, a editora e comisaria de arte contemporánea Elena Ochoa, unha veterana deste premio, deulle o seu respaldo desde o inicio xa que, segundo recoñecía ao comezo das deliberacións, traballou "en moitas ocasións" con este creador surafricano con quen está a preparar para outubro unha exposición na Raíña Sofía de Madrid.
Nacido en Xoannesburgo en 1955, os seus pais exerceron como avogados especializados nas vítimas do apartheid e o seu pai ocupouse da defensa de Nelson Mandela, circunstancia que determinou a súa formación universitaria –Ciencias Políticas– antes de dedicarse á arte.
Os seus pais exerceron como avogados especializados nas vítimas do apartheid e o seu pai ocupouse da defensa de Nelson Mandela, circunstancia que determinou a súa formación universitaria, Ciencias Políticas
Nos anos oitenta trasladouse a París para estudar teatro na Escola Internacional de Teatro Jacques Lecoq e traballou como director artístico en series de televisión, antes de comezar a crear animacións a partir dos seus propios debuxos. Desde os anos noventa combinou a práctica do debuxo co cine e o teatro, converténdose nun artista multidisciplinar que cultivou, ademais, a escenografía, o collage, o gravado, a escultura e o videoarte.
Kentridge, que elixiu o debuxo como vehículo expresivo de emocións e metáforas relacionadas coa historia e a realidade sociopolítica surafricana, deuse a coñecer fóra do seu país tras a súa participación na feira Documenta X de Kassel (Alemaña, 1997) e nas bienais de Sãou Paulo (Brasil, 1998) e Venecia (Italia, 1999). Desde entón, os seus debuxos animados ou "películas debuxadas", como as denominan algúns especialistas, percorreron as salas dos centros de arte máis prestixiosos do circuíto internacional.
A partir de 2003, Kentridge comezou a interesarse pola escultura e a videoinstalación e a incluír referencias ao teatro, a ópera e o cine nos seus novos traballos.
Na última década mostrou a súa produción artística no MoMA (Nova York), que lle dedicou unha retrospectiva en 2010, o Albertina Museum (Viena), o Louvre (París) e o Museo de Belas Artes de Budapest, entre outros museos.
O Premio Princesa de Asturias das Artes está destinado a recoñecer a aqueles "cuxa labor contribúa, de xeito extraordinario e a nivel internacional, ao progreso e benestar social a través do cultivo e perfeccionamento da cinematografía, o teatro, a danza, a música, a fotografía, a pintura, a escultura, a arquitectura e outras manifestacións artísticas".
O pasado ano, este galardón foi para a actriz e directora Núria Espert, que se uniu así a unha nómina da que tamén forman parte Francis Ford Coppola, Michael Haneke, Norman Foster, Woody Allen, Paco de Lucía, Vittorio Gassmann ou Bob Dylan. O acto de entrega dos Premios Princesa de Asturias celebrarase, como é tradicional, en outubro no Teatro Campoamor de Oviedo, nunha solemne cerimonia presidida polos Reis.
Cada Premio Princesa de Asturias está dotado coa reprodución dunha escultura de Joan Miró –símbolo representativo do galardón–, a cantidade en metálico de 50.000 euros, un diploma e unha insignia.
