A doutora Marta Pérez, que sufriu cancro de mama e é voluntaria da Asociación Española Contra o Cancro (AECC), leu este venres un manifesto na Coruña con motivo do día mundial contra esa enfermidade e avogou por centralizar a atención e aplicar a radioterapia intraoperatoria. Nun evento da AECC no Sporting Club Casino da Coruña apoiado por numerosas institucións, Pérez abriu unha xornada na que se iluminarán de rosa monumentos tan significativos da cidade galega como a Torre de Hércules.
A doutora recordou que o ano pasado en Galicia o cancro de mama "matou a 451 mulleres, máis dunha ao día, e producíronse 1.738 novos casos, case cinco diarios", polo que é "o tumor máis frecuente" entre a poboación feminina.
Incidiu na necesidade de reducir "factores de risco e aplicar estratexias preventivas", porque, "se se descobren a tempo, as posibilidades de recuperación para moitos tipos de tumores malignos son excelentes", dixo. "Día a día ímoslle gañando terreo á enfermidade. A supervivencia aumenta un 1,4 por cento anualmente. Se o tumor está localizado na mama, aos cinco anos, esa supervivencia é do 99 por cento e, se hai afectación ganglionar, do 85. Unha porcentaxe que baixa ao 27 por cento, se se diseminou noutra parte do corpo", relatou.
O tabaco, o exceso de peso, a mala alimentación, a inactividade física, o consumo de alcol ou as radiacións ionizantes son os principais factores de risco.
Considerou que a "investigación é clave na loita contra o cancro", explicou que "o avance nos tratamentos nos últimos anos foi espectacular" e lamentou que "a crise económica" impactase con dureza "no mundo da ciencia" cunha "caída do investimento tan brutal como traumática". "En Galicia e España, o 99 por cento dos fondos que se destinan a investigación son públicos", asegurou a doutora, quen defendeu que non se deixe o financiamento dos programas de investigación "exclusivamente en mans das Administracións porque é unha carreira a longo prazo, que non pode depender dos vaivéns dos Orzamentos do Estado".
Por iso considerou que "a sociedade civil" debe implicarse "porque a investigación é o único que vai curar os tumores malignos". Tamén sinalou que Galicia, a pesar de gozar "dunha boa sanidade pública e duns magníficos profesionais", presenta un "grave problema de organización sanitaria".
Por todo iso, pediu a centralización da atención oncolóxica nun único centro para que os pacientes non teñan que acudir a diferentes hospitais e a posta en funcionamento da radioterapia intraoperatoria, para que moitas enfermas poidan saír do quirófano non só operadas senón, tamén, co tratamento radioterápico xa realizado. "Deste xeito, evitarase que as mulleres teñamos que desprazarnos 15 ou 25 veces ao hospital, para recibir esa terapia, co custo persoal, social e económico que leva", dixo.
Entre as medidas solicitadas tamén incluíu "a unificación dos protocolos e das bases de datos, o incremento dos recursos públicos destinados á investigación oncolóxica" e tamén favorecer os investimentos privados ou deseñar obxectivos a longo prazo acordados cos profesionais, asociacións de pacientes e ONGs.
Aos medios de comunicación tamén lles demandou que "exerzan un xornalismo serio e contrastado e non xeren falsas expectativas", senón que "informen desde a evidencia científica e foxan os cantos de sirena dos que se instalaron na manipulación e as seudociencias".
