O actor Leonardo DiCaprio e o director Martin Scorsese realizarán unha sexta película xuntos, a adaptación cinematográfica da novela The Devil in the White City, do escritor Erik Larson, informou este martes a cadea CBS.
O proxecto, un dos que máis gustou ao actor nos últimos anos, concretouse despois de que Paramount se fixese finalmente cos dereitos fronte a outros estudos como Fox e Universal, tamén interesados nesta historia sobre un asasino serial baseada en feitos reais.
O relato de Larson narra os crimes acontecidos ao redor da Feira Internacional de Chicago de 1893 e céntrase nas figuras do arquitecto responsable da construción do recinto feiral, Daniel H. Burnham, e o construtor do hotel que se levantou nas instalacións, H.H. Holmes.
Naquel establecemento, Holmes deseñou un crematorio, unha cámara de gas e unha área para diseccionar os corpos das súas vítimas.
Está previsto que DiCaprio encarne a Holmes neste filme que será a próxima longametraxe que dirixirá Scorsese.
Ata a data, DiCaprio e Scorsese colaboraron en Gangs of New York (2002), The Aviator (2004), The Departed (2006), Shutter Island (2010) e The Wolf of Wall Street (2013).
DiCaprio estreará este ano The Revenant, un western dirixido e escrito polo cineasta mexicano Alejandro González Iñárritu, mentres que o próximo filme realizado por Scorsese leva por título Silence, conta a historia da persecución a misioneiros cristiáns en Xapón no século XVIII, e debutará en 2016.
DiCaprio e Scorsese farán unha sexta película xuntos
Trátase da adaptación cinematográfica da novela 'The Devil in the White City', do escritor Erik Larson, informou este martes a cadea CBS
