O rapeiro Pablo Rivadulla, coñecido como Pablo Hasel, condenado en 2014 pola Audiencia Nacional (AN) a dous anos de prisión por enaltecemento do terrorismo por pedir nas súas cancións o asasinato de políticos, foi detido este martes polos Mossos d'Esquadra pola súa presunta participación nas agresións a xornalistas a principios de xuño na Universitat de Lleida (UdL).
A detención polos incidentes no Reitorado da UdL, onde foron agredidos dous xornalistas de TV3 e un fotógrafo do diario Segre, produciuse ás 13.50 horas na porta da vivenda do mozo, na praza do Hort de Santa Teresa de Lleida, informaron a Europa Press os Mossos d'Esquadra.
Hasel sumouse ás protestas dun grupo de estudantes contra as clases da subdelegada do Goberno, Inma Manso, que querían mostrar o seu desacordo coa política da Unión Europea e de España sobre os refuxiados e participou no peche iniciado o 17 de maio no que —na xornada do 2 de xuño— foron agredidos os xornalistas.
TV3 denunciou as agresións na comisaría dos Mossos d'Esquadra e tamén as pintadas que sufriu a fachada da delegación. Un día logo das agresións aos redactores, as sedes de Segre e TV3 amenceron con manchas de pintura e uns días despois na fachada da delegación desta cadea apareceron impactos de pedras nos seus cristais e pintadas nas que podía lerse 'manipuladores' e 'non sodes xornalistas'.
Detido o rapeiro leridano Pablo Hasel por agredir a varios xornalistas
En 2014 xa foi condenado pola Audiencia Nacional a dous anos de prisión por enaltecemento do terrorismo por pedir nas súas cancións o asasinato de políticos
