Charlie Hebdo recibe o seu premio PEN no medio dunha forte seguridade

A cerimonia de entrega do premio PEN á liberdade de expresión á revista satírica Charlie Hebdo tivo lugar esta noite en Nova York no medio de fortes medidas de seguridade e da división de opinións no seo da organización pola concesión do prestixioso galardón. Despois de que seis membros do PEN American Center mostrasen a súa repulsa a este fallo a finais de abril e de que 140 membros máis se acabasen sumando, Charlie Hebdo, a revista vítima dun atentando en París o pasado xaneiro, recibiu finalmente o seu galardón nunha cerimonia no Museo de Historia Natural.

O redactor xefe da publicación, Gerard Biard, e Jean-Baptiste Thoret, que chegou tarde a traballar o día do atentado, acudiron á cerimonia e deron unha mensaxe clara aos autores do ataque: "Eles non queren que debatamos e nós debemos debater". Nunca unha gala de literatura fora tan reforzada polas forzas de seguridade, pero dado que os homenaxeados son obxectivo de terrorismo radical e tras o ataque do domingo pasado no Centro Curtis Culwell de Garland, o suburbio de Dallas (EE.UU.) que acollía a exhibición de caricaturas do profeta Mahoma, a cidade non escatimou en efectivos.

"A misión de satirizar os temas sacros perdura", explicou Biard, confirmando a valentía que recoñeceron desde o núcleo duro do PEN American Center. "Estar impresionado é parte do debate democrático. Ser atacado a tiros, non", concluíu. A organización, ao anunciar este galardón, asegurou que "por pagar o prezo definitivo polo seu exercicio da liberdade de expresión, e logo militar no medio da súa devastadora perda, Charlie Hebdo merece ser recoñecido pola súa valentía fronte a un dos atentados máis nocivos contra a expresión na memoria recente".

Pero máis tarde, os escritores Peter Carey, Michael Ondaatje, Francine Prose, Teju Cole, Rachel Kushner e Taiye Selas cancelaron a súa asistencia á gala por considerar que, á marxe da traxedia propiciada por un grupo radical islámico, a revista representa "intolerancia cultural" e "unha especie de visión secular obrigada", en palabras de Kushner a The New York Times.

Na cerimonia deste martes, a pesar das ausencias, estiveron presentes algúns dos escritores que prestaron o seu apoio desde o principio aos traballadores de Charlie Hebdo, como Salman Rushdie, mentres que nas redes sociais houbo reaccións variadas, como a da escritora Joyce Carol Oates, que tachou a controversia de "desproporcionada e terxiversada".