O actor estadounidense James Cromwell, a estrela do filme infantil Babe (1995), foi detido hoxe no parque temático SeaWorld de San Diego (EE UU) cando participaba nunha protesta da organización animalista PETA que interrompeu nun "show" protagonizado por orcas.
Un vídeo aloxado no perfil de Facebook de PETA mostrou a Cromwell e a un grupo de seis activistas levando carteis e camisetas coas lemas "SeaWorld apesta" e "SeaWorld mata".
O actor lanzou consignas ao público usando un megáfono mentres a función das orcas continuaba ás súas costas.
"Os meus amigos de PETA e eu queremos que SeaWorld leve sen demora estes animais a refuxios mariños"
Un home do público, que lle lanzou un líquido en primeiro lugar, golpeou o megáfono de Cromwell pouco antes de que membros de seguridade do parque aparecesen no lugar para levar ao intérprete. Posteriormente, os outros seis activistas foron esposados e desaloxados do recinto.
PETA divulgou un comunicado de prensa no que explicou que a acción tiña por obxectivo informar os cidadáns sobre "o historial de mortes prematuras de orcas" en SeaWorld. "As orcas merecen unha vida completa no océano, non unha cadea perpetua de nadar en círculos sen fin ata que caian mortas por unha enfermidade", sinalou Cromwell na nota.
"Os meus amigos de PETA e eu queremos que SeaWorld leve sen demora estes intelixentes animais a refuxios mariños", engadiu.
A carreira de Cromwell, de 77 anos, inclúe papeis nas series The Young Pope e American Horror Story así como na longametraxe L.A. Confidential (1997).
Cromwell, coñecido ademais de por a súa traxectoria artística polo seu labor como activista, foi condenado a unha semana de cárcere o pasado xuño por negarse a pagar unha multa tras ser detido en 2015 nunha protesta contra unha central eléctrica en Nova York.
