Anxo Lugilde, que ademais de colaborar no Grupo El Progreso tamén traballa para La Vanguardia e é tertuliano en radio e televisión, recibiu este mércores o premio Puro Cora na súa vixésimo segunda edición, cando, curiosamente, cumpre 25 anos de profesión.
O politólogo remarcou, ao recoller o premio, sentirse ''moi satisfeito'' por este recoñecemento. Acompañado pola súa nai no acto, sentada na mesa presidencial, recordou con agarimo durante o seu discurso de agradecemento as súas orixes lucenses e o seu amor por Triacastela, onde están as súas raíces familiares.
A presidenta do Grupo El Progreso, Blanca García Montenegro, dedicou eloxios á ampla traxectoria de Lugilde, ao que minutos antes fixera entrega do galardón -tras a preceptiva lectura do fallo a cargo do director xeral José de Cora-, e referiuse ao reto da nova plataforma dixital que acaba de estrear o grupo e na que, cada semana, poden atoparse as crónicas do galardoado este mércores.
O presidente da Xunta, Alberto Núñez Feijóo, tamén dedicou unhas palabras á figura e traballo de Lugilde, destacando o seu acerto no escrutinio da vida política. Fixo unha defensa da liberdade de expresión e, xa nun ton máis emotivo, felicitou tamén á nai do galardoado.
No acto, desenvolvido ante máis dun centenar de persoas nas instalacións que El Progreso ten no polígono industrial do Ceao, estiveron presentes, así mesmo, numerosas autoridades, representantes de diversas formacións políticas e de distintos ámbitos da sociedade lucense e galega, especialmente do mundo da comunicación. Entre eles cabe citar, ademais do presidente da Xunta, ao delegado do Goberno, Santiago Villanueva; aos conselleiros Francisco Conde, Ethel Vázquez e Román Rodríguez; ao presidente da Deputación, José Ramón Gómez Besteiro; ao alcalde de Lugo, José López Orozco; ao expresidente galego Fernando González Laxe; varios exalcaldes de Lugo e dirixentes e cargos de PP, PSOE e BNG, como o seu portavoz, Xavier Vence.
►AMPLIADO NA EDICIÓN IMPRESA DESTE XOVES
