Andrea descansa mellor e os pais piden respecto para superar o duro transo

Andrea, a nena de 12 anos cunha enfermidade rara e irreversible para a que se solicitou unha morte digna, durmiu ben todas estas noites, non ten dor e os seus pais, Antonio Lago e Estela Ordóñez, piden "respecto" para superar este duro "transo", o de despedirse da súa filla maior. O avogado da familia, Sergio Campos, explicouno este xoves á saída do xulgado que se encarga deste caso, tendo en conta que os pais da menor chegaron á vía xudicial, e apuntou que todo avanza segundo o previsto e "a idea é respectar este transo difícil" para os proxenitores e parentes da pequena.

O equipo xurídico que os asiste non pode estenderse máis aló do que estes clientes consideraron razoable, subliñou, e confesou respectalo, á parte de pola parte profesional, no persoal, "xa que a min paréceme unha sensata decisión".

Por iso, observou, "unicamente dicir que as cousas van, pois, como por desgraza, esperamos que fosen, e tampouco se pode saber se isto é cousa de horas, de días ou de semanas. Simplemente, pois a evolución natural das cousas, do organismo de Andrea". "Non está nas nosas mans -proseguiu- e creo que nin nas dos médicos saber cando se producirá o desenlace" e, apuntado isto, o letrado contou que a paciente está sedada, descansa "tranquila" e, a medida que se vaia incrementando a deterioración fisiolóxica, en consecuencia as doses de fármacos calmantes que se lle administran irán en aumento.

O complexo hospitalario universitario de Santiago (Chus), no que está ingresada Andrea, expuxo modificar o plan terapéutico ao producirse cambios no estado da cativa.

A xerencia informou nun comunicado de que se deu aviso tanto ao xulgado que entende deste caso como aos pais da paciente Andrea, destes "cambios clínicos" que, apostilaron, provocaron alteracións no plan terapéutico seguido ata ese momento, co visto e prace da xustiza, e levaron á modificación practicada, retirar a alimentación que Andrea recibía por gastrostomía, algo que se fixo coa conformidade dos seus pais. O servizo de Pediatría do Chus enviou un comunicado no que entende que a súa actuación se adecuou "en todo momento ao establecido na normativa vixente".