A Xunta dedicará 100.000 euros para o traslado dunha liña eléctrica en Valdriz, actuación que se executa dentro das obras de construción da senda peonil e ciclista que unirá a urbanización deste núcleo coa Pobra de San Xiao (Láncara), segundo informou o grupo municipal do PP. Esta contía súmase aos preto de 610.000 euros que a administración destina ao paseo.
O estado das obras foi abordado nunha reunión do portavoz do PP lancarés, Santiago Cubillas, e o concelleiro Arturo Sobrado co delegado da Xunta en Lugo, José Manuel Balseiro.
Cubillas asegurou que os traballos "avanzan segundo o previsto". Segundo explicou, a actuación comezou nas zonas que non están afectadas pola liña eléctrica, a cal será soterrada a través dunha instalación anexa á ponte do río Neira. Esta obra complementaria atópase pendente de obter o permiso do Concello, despois de que lle concedesen á Xunta as correspondentes autorizacións de Industria, indicou.
A actuación supón a construción dunha senda de 460 metros que discorrerá pola marxe esquerda da estrada LU-621. Tamén se realizan obras no viaduto, a ampliación da plataforma da estrada (pasando de 5,5 a 7 metros) e a construción dunha glorieta no acceso á urbanización. Estes traballos, cun prazo de oito meses, comezaron en outubro e estiveron paralizados polas choivas.
O portavoz popular destacou que se trata dunha actuación "moi demandada" polos residentes na zona e que "foi promovida a instancias do grupo municipal do PP tras escoitar as peticións" dos veciños.
