A Consellería de Infraestruturas e Mobilidade adxudicou por preto de 45.000 euros a mellora da estrada que une Pedrafita do Cebreiro e Palas de Rei (LU-633), na entrada de Triacastela. Os traballos permitirán a creación dunha zona verde e un aparcadoiro, co obxectivo de que poidan pasar a noite autocaravanas.
Trátase do resto dunha curva do antigo trazado da vía, no quilómetro 28. O arranxo deste espazo foi solicitado polo goberno local durante unha visita hai uns meses da conselleira de Infraestruturas, Ethel Vázquez, á localidade.
As obras consistirán en repor o firme da calzada, saneándoo e estendendo unha capa de mestura bituminosa en quente. Tamén se instalará unha barreira de seguridade que protexa esta nova zona con respecto á calzada da LU-633, segundo informou a administración autonómica.
A actuación incluirá a nivelación do espazo entre estradas para a súa humanización con zonas verdes e a colocación de mobiliario urbano. Desta forma, embelecerase o acceso a Triacastela.
A consellería adxudicou estes traballos á empresa Ovisa Pavimentos e Obras, para os que terá un prazo de execución de tres meses.
