A Xunta de Galicia anticipirá entre este mes e xuño o pago de preto de 300 millóns de euros de diferentes liñas de axudas que xestiona a Consellería de Medio Rural. Así o anunciou a Administración autonómica con motivo dunha visita do presidente, Alberto Núñez Feijóo, e o conselleiro de Medio Rural, José González, a Queserías Sarrianas, en San Salvador do Mato (Sarria).
A medida busca, sinalou, "inxectar liquidez aos agricultores, gandeiros e silvicultores" ante a crise sanitaria, seguindo as recomendacións do comité de expertos económicos da Administración autonómica.
A Xunta, por unha banda, axilizará o abono de subvencións xa concedidas e que só están pendentes de comprobación en campo e pago. Adiantou que este mesmo venres o Diario Oficial de Galicia publica unha orde polo que se aplicará isto a todas as axudas convocadas pola consellería que se atopan nesta situación. Desta forma, darase "flexibilidade aos controis no campo, co fin de adiantar os seus pagos aos meses de maio e xuño". A contía total desta axilización é de 65,7 millóns de euros, dos que preto de 16 xa se están ingresando nestes días.
A administración tamén anticipará ata un 50% das axudas agrícolas, gandeiras e de desenvolvemento rural das convocatorias cofinanciadas por fondos europeos, como é o caso dos plans de mellora ou a iniciativa Leader. Por este concepto adiantaranse 18,5 millóns de euros. Neste caso non será necesario que os beneficiarios acheguen aval da entidade bancaria.
Unha terceira medida do plan de liquidez é a firma dun convenio entre a Xunta e os bancos para o anticipo das axudas da Política Agraria Común (PAC) correspondentes a este ano, que supoñen sobre 210 millóns de euros. Por este acordo, as entidades bancarias adiantarían os fondos e a Administración autonómica asumiría os intereses. Así, os gandeiros e agricultores poderán cobrar a PAC canto antes e sen ningún tipo de custo, mentres que habitualmente ingresaban as axudas nos meses de outubro e novembro.
A través desta vía a Administración autonómica adquiriu numerosos alimentos a empresas co "fin de axudalas ante o peche das súas canles habituais de comercialización" e "poñer ao alcance dos colectivos máis vulnerables producións de proximidade e calidade diferenciada".
Entre estas firmas atópase Queserías Sarrianas, cuxas instalacións visitou onte Alberto Núñez Feijóo. O presidente coñeceu o proceso produtivo da empresa e abordou cos seus responsables a súa situación.