O xulgado contencioso-administrativo número 2 de Lugo deu un ultimato ao Concello sarrián para que acabe de tirar un polémico peche dunha leira de Vilar de Sarria, para o que lle concedeu un prazo dun mes.
O muro foi construído sen licenza municipal, polo que propios donos debían demolelo e ao non facelo ten que derrubalo o Concello de forma subsidiaria. A polémica por este peche remóntase a hai unha década e a xunta de goberno tomou varios acordos de tiralo entre os anos 2014 e 2017. En 2018 derrubouse parte do muro, pero o denunciante, Eugenio Márquez, afirmou que non se executasen as obras na súa integridade.
En xuño de 2019 o xulgado concedeu ao Concello dous meses para realizar os traballos e a reclamar aos propietarios da leira o custo da actuación. As obras consisten en acabar de eliminar algúns restos do peche, restablecer unha gavia e retirar unhas árbores. As actuacións non se executaron e o demandante volveu acudir aos tribunais, que deron outro prazo de dez días ao Concello para levalas a cabo. Ao continuar sen executarse, o denunciante reiterou en febreiro a súa petición ao xulgado e demandou que se lle impoñan multas coercitivas ás persoas responsables.
O Concello alegou que comezou os trámites e non puido continuar porque se declarou o estado de alarma e suspendéronse os prazos administrativos. Ademais, sinalou que para levar a cabo as obras e dar por cumprimentada a execución é necesaria a tramitación "dun expediente de contratación que levaría o seu tempo", recolle o auto, con data do 13 de xullo. O tribunal ve "razoable" a xustificación, polo que non lle impón unha multa. Con todo, dado o tempo transcorrido desde o escrito iniciador do procedemento, establece un "improrrogable" prazo dun mes para cumprir coa sentenza, senón imporalle multas coercitivas. O alcalde, Claudio Garrido, asegurou que en canto poidan realizarán as obras.
O denunciante sinalou que están a esperar que se execute a sentenza para tomar as accións civís pertinentes contra os donos da leira "polos"&prexuízos nbsp;causados na súa propiedade. Segundo o demandante, en época de choivas, despois de que se construíse o muro, a auga chegaba á súa casa. Este muro, denunciou, ocupa parte do camiño público de Barreiros e tapouse unha gavia.
