O xulgado de Primeira Instancia e Instrución de Sarria arquivou a causa contra a alcaldesa, Pilar López, e o seu antecesor no cargo, José Antonio García, por unha suposta desobediencia á orde de derriba parcial dun edificio no centro da vila. Ambos testificaran no tribunal como investigados despois de que a Fiscalía interpuxese unha denuncia por un presunto delito de desobediencia.
A xuíza considera que "non aparece debidamente xustificada a perpetración do delito" que deu lugar á formación da causa. Por iso, decretou o sobresemento provisional das actuacións contra López e García, quen se mostraron satisfeitos co arquivo. Contra o auto pódese interpor recurso de reforma e subsidiario de apelación dentro dos tres días seguintes á súa notificación ou recurso de apelación directo nos cinco despois.
A Fiscalía presentou o pasado outubro unha denuncia na que recorda que o xulgado do Contencioso-Administrativo número 2 de Lugo emitiu unha sentenza no ano 2010 pola que se ordena ao Concello executar de forma subsidiaria os decretos de 1997 e 2003 e, en consecuencia, acometer as demolicións necesarias no edificio.
Dado que o fallo non foi executado o fiscal considera que desde o Concello tívose unha conduta "totalmente pasiva". Por iso, indicou na denuncia que se podería tratar dun delito de desobediencia e pediu que declarasen como investigados a alcaldesa e o seu predecesor. Ambos acudiron ao xulgado o pasado mes de xaneiro e declararon que cumpriron a lei con respecto ao inmoble.
TRÁMITES. A rexedora sinalou entón que desde que tivo constancia do caso actuou e presentou unha certificación con todos os trámites que realizou no seu mandato para cumprir coa sentenza. Entre as xestións levadas a cabo está a aprobación do proxecto de derrube do edificio e a recente adxudicación do proxecto de reconstrución do inmoble. De todos estes trámites deu conta ao xulgado, sinalou onte Pilar López.
O anterior alcalde tamén indicou ante o tribunal que durante o seu goberno levaron a cabo todas as tramitacións. Explicou, ademais, as xestións realizadas no seu mandato, no que, dixo, sacaron a licitación e adxudicaron o proxecto de execución das obras de demolición parcial do inmoble e adaptación á licenza concedida e os proxectos de dirección de obra e coordinación de seguridade e saúde.
