A vixesimonovena Festa de Convivencia cos nosos Maiores, organizada pola fundación O Noso Lar, reuniu o domingo a 800 persoas nos baixos da casa consistorial de Samos. A xornada, que estivo dedicada aos 25 anos da chegada das relixiosas franciscanas a Lousade, sufriu un cambio de lugar polo mal tempo da mañá.
Uns 50 voluntarios traballaron o sábado nos preparativos nun robledo en Castro de Lourido. Con todo, a choiva durante a mañá do domingo obrigou a buscar un novo emprazamento o mesmo día, polo que se trasladou o material aos baixos do concello. "Hai que felicitar aos voluntarios polo traballo realizado", explicaba o presidente da fundación, Miguel Gómez. Esta circunstancia obrigou a modificar o programa, atrasando a misa unha hora, ademais da homenaxe aos maiores, que se pospuxo ata logo da comida.
Tras a homilía entregouse unha placa para conmemorar a contribución das relixiosas franciscanas durante os 25 anos en Lousade. O discurso estivo cargado de emoción, posto que "son moitas as experiencias" durante este cuarto de século, detallou Gómez. Pola súa banda, unha das tres relixiosas, Josefa Gómez, agradeceu o galardón, aínda que explicou que os veciños xa lle mostran o agarimo "día a día".
A música tamén tivo o seu espazo nesta xornada. Antes da comida e durante a misa actuou o grupo de música tradicional Frebudos, de Lugo. De igual forma, a partir das 18.00 horas a banda melidá de folk Leirabuxo amenizou o evento.
Ademais, sorteouse unha tenreira. A cantidade recadada serviu para sufragar os custos da festa, algo ao que tamén colaboraron a Deputación e o Concello.
