O proxecto europeo Life Evergreen with Volunteer (Lewo) clausurouse o pasado fin de semana no municipio de Triacastela coa recollida de lixo na contorna do Camiño de Santiago. Un grupo de voluntarios retirou entre 200 e 300 quilos de desperdicios, segundo os cálculos do Concello.
O proxecto desenvólvese dentro do programa Life 2016 da Comisión Europea e lévao a cabo a Dirección Xeral de Xuventude da Xunta para concienciar sobre a importancia de respectar e pór en valor diferentes espazos naturais da comunidade. As xornadas de limpeza en Triacastela foron as últimas que se desenvolven este ano e contaron coa participación de mozos galegos.
Estes encargáronse de retirar desperdicios dun antigo vertedoiro incontrolado xunto á ruta xacobea. Os voluntarios recolleron desde plásticos ata botellas, latas e rodas, mellorando a contorna do Camiño, polo que transitan cada ano miles de peregrinos de todo o mundo.
Os mozos tamén aproveitaron o fin de semana para coñecer lugares de interese na zona. Percorreron a ruta de sendeirismo de San Mamede de Triacastela e a Devesa da Rogueira, no Courel.
Dentro do proxecto Lewo uns voluntarios xa estiveron o pasado ano no municipio de Triacastela realizando labores de limpeza. Naquela ocasión ocupáronse de acondicionar a ruta de San Mamede. Tamén actuaron noutros puntos da comunidade galega.
A alcaldesa de Triacastela, Olga Iglesias, visitou aos participantes e agradeceulles o traballo que realizaron na localidade.