Preto de 25 nenos e nenas de todas as idades protagonizan un documental co que promocionan o concello do Incio e reivindican o seu futuro.
O traballo, dirixido polo profesor Jesús Somoza Fernández, titúlase Documental do noso e serviu aos pequenos para que se visualice o orgullosos que están do lugar no que viven e facer reflexionar, explican desde o Concello.
A gravación foi realizada durante as actividades de verán do municipio, que tiveron lugar todos os martes e xoves co obxectivo de que os nenos "aprenderan cousas a través de xogos e a educación en valores".
A obra, que foi estreada o pasado domingo na Feira de Artesanía e Etnografía, ten unha duración de 17 minutos, ao longo dos que explican os motivos polos que viven no rural e os seus puntos fortes. Ademais, reflexionan sobre o seu futuro e invitan a tomar medidas para frear a perda de poboación. Algunhas das súas propostas son crear postos de traballar, formar grupos de veciños para arranxar as vivendas abandonadas, evitar os incendios, non perder servizos, mellorar rutas, facer un centro cultural, pór en marcha un instituto ou promocionar o municipio "para que se dean conta da cantidade de cousas boas que ten o rural".
Os nenos invitan a visitar distintos lugares do concello, como o encoro de Vilasouto, a Ruta do Ferro, A Ferrería, a igrexa de Hospital... "Cada pobo ten o seu potencial", apunta un dos pequenos. Estes animar a desprazarse ao Incio a coñecer a súa cultura, tradicións, festas e paisaxes.
VIVIR NO RURAL. Para os protagonistas do documental "é moitísimo mellor" vivir no rural, do que destacan "a tranquilidade e o silencio", que existe "máis liberdade" e "moito sitio onde xogar". Definen O Incio como natural, bonito, único, marabillo e "terra brava". É "un lugar para protexer, valorar e querer. Iso é o concello do Incio", conclúen os nenos no traballo.
"Nada mellor que sexan eles os que conten o orgullosos que están do seu como base da riqueza do pobo", apunta o director do documental, que é protagonizado tanto por nenos do municipio como doutros puntos de España. O 90% deles está escolarizado no colexio Ricardo Gasset do Incio, mentres que o resto pasa as súas vacacións neste concello, chegados desde Madrid ou Cataluña, entre outros lugares.
O alcalde, Héctor Corujo, afirma que se tratou dunha experiencia moi positiva, na que os nenos se mostraron implicados e motivados, e a través da que dan a coñecer o rural e as súas potencialidades.
