O cruzamento entre as rúas Pedro Saco e Rúa Nova resultou ser un dos principais puntos negros do centro urbano de Sarria, onde se rexistran con frecuencia choques por alcance, en moitos casos con feridos. Esta alta sinistralidade fai que sexa unha das interseccións elixidas para instalar dous pasos de peóns elevados cos que intentar reducir os accidentes e gañar en seguridade, tanto para os viandantes como os condutores.
En total, serán sete os novos pasos de peóns que se coloquen proximamente en diversos puntos da vila cun investimento de 48.000 euros con cargo ao plan único da Deputación de Lugo e un prazo de execución dun mes.
Reducir a sinistralidade é un dos obxectivos, pero tamén rebaixar a velocidade de circulación dos vehículos. Por iso, outro dos pasos instalarase na entrada a Sarria desde Samos, un pouco antes da rotonda que enlaza coa Rúa Castelao e preto da sede de Inelcom, de modo que tamén dará servizo aos numerosos empregados deste centro de traballo.
Segundo explica o concelleiro de seguridade cidadá, Félix Seijas, as zonas escolares non podían faltar neste proxecto. Así, considerouse necesario situar un paso para peóns elevado en Formigueiros, á altura do cruzamento coa Rúa Asunción, por ser lugar de acceso a un dos centros de ensino de Sarria.
Outro destes elementos irá na Rúa Castelao, xunto ao pavillón de deportes. Ademais, nesta rúa será substituído o paso que existe xunto ao cuartel, debido a que o actual non cumpre a normativa e suscita queixas dos condutores polo seu desnivel. Neste punto haberá que facer demolicións previas, do mesmo xeito que ocorre na Rúa Peregrino, onde hai outro paso que tampouco se adapta á norma vixente e será renovado.
Na Rúa Xela Arias, a Deputación actualizou hai uns días a sinalización horizontal e aproveitou para responder a unha demanda veciñal cambiando un paso de peóns. O que había estaba moi preto do cruzamento coa LU-546, o que supuña un risco, motivo polo cal foi atrasado uns metros.
Esta rúa, onde acaba de facerse efectivo o cambio de nombre para honrar ao poeta sarriá recoñecida co Día das Letras Galegas, tamén foi elixida para comezar a implantar unha serie de pictogramas en pasos de peóns que servirán para mellorar a autonomía das persoas con trastorno do espectro do autismo (Tea). A iniciativa, que se ampliará despois a outras rúas sarriás, realízase en base a un convenio entre o Concello e a asociación Teavial, coa colaboración do veciño Juan José López Yáñez.
Desde o Concello tamén se dirixiron á Xunta de para pedir dous pasos elevados en vías da súa titularidade. Un deles daría servizo aos peregrinos na rúa Benigno Quiroga, á altura da Escalinata Maior. O outro, en Matías López, xunto ás Insuas, serviría para reducir a velocidade dos coches que entran ao centro urbano de Sarria desde Lugo.
