Os veciños das rúas Porvir, José Antonio, Nova, Castiñeiras e Pedro Saco de Sarria séntense "desesperados" ante a "inoperancia e desinterese das institucións, especialmente do Concello", coa canceira "ilegal" do barrio de San Lázaro.
Os residentes na zona denuncian que desde o Concello mentíronlles, pois díxoselles que era "provisional" e que os sacarían "en poucos días". Con todo, xa van "case tres anos de provisionalidade".
Afirman acudir ao Concello, Policía Local, Garda Civil, Seprona, Valedora do Pobo, Deputación, delegación provincial da Consellería de Medio Ambiente, partidos políticos, técnicos ou avogados. "Todos os que nos contestaron dannos a razón: esta canceira é ilegal e ilegalizable, ademais de inadecuada. Menos o Concello, que nunca constesta", sinalan nun manifesto que difunden entre os veciños.
Din estar "aburridos" de presentar reclamacións, denuncias e máis dun centenar de firmas sen obter "ningún resultado no Concello". Por iso, instan ás institucións a que se poñan no seu lugar e vivan con máis "de 20 cans ladrando e aullando á vez a calquera hora do día e, o que é moito peor, a calquera hora da noite a poucos metros das súas propias vivendas e dormitorios".
Os veciños pregúntanse que teñen que facer para que os organismos os escoiten e poidan descansar nos seus domicilios e anuncian que farán "todo o que haxa que facer" para que se cambie de localización o refuxio.
Os denunciantes insisten en que non están en contra dos cans, senón que senten "mágoa" polos animais ao estar "metidos case 24 horas ao día en gaiolas de dous metros cadrados sen ningún benestar para eles".
O refuxio instalouse na Rúa do Porvir no 2016 e os veciños da zona apoiaron tamén aos do Mazadoiro, quen se opuxeron a unha canceira no seu barrio.
