Estes difíciles momentos, en plena pandemia de coronavirus, deixan iniciativas solidarias e de axuda aos demais. é é caso da asociación cultural Val de Láncara
Baixo a lema Para coidarnos e coidar, a iniciativa, que é gratuíta, está destinada a veciños das parroquias de Láncara, Carracedo e Armea, aínda que tamén poderían axudar a outros de núcleos próximos.
Desde o colectivo levarán a cabo reparto de alimentos ou medicamentos, para o que os veciños interesados débense pór en contacto coa propia asociación. Estes poderán encargar a súa compra en calquera establecemento de Láncara ou ben medicamentos nas farmacias do concello e membros da entidade pasarán a recollelos e levaranllo á súa casa.
Val de Láncara pon en marcha este servizo ao estar a empeorar cada vez máis a situación sanitaria e co fin de axudar a aquelas persoas que o poidan precisar. "Somos bastante xente nova e queremos ser útiles no que a xente o precise, nunca se sabe quen o pode necesitar", apuntou o colectivo.
A asociación puxo en marcha a iniciativa esta mesma semana e anunciouna xa a través das redes sociais para chegar ao maior número de persoas. Tamén prevén colocar carteis en espazos como os supermercados de Láncara para informar o proxecto. Co servizo queren "intentar axudar un pouquiño nestes tempos", afirmaron desde Val de Láncara.
As persoas que precisen este servizo de entrega a domicilio poden porse en contacto coa asociación a través dos teléfonos 691.17.56.50 (María), 659.14.56.66 (Óscar) ou 630.76.26.88 (Rayko).
UN COLECTIVO VETERANO. O colectivo Val de Láncara naceu a principios dos 90 e desde o pasado verán conta cunha nova directiva ao tomar a substitución un grupo de mozos da parroquia. A entidade organiza desde hai anos diversas iniciativas, xa fixas no calendario lancarés, como a entrega do premio Ramón Piñeiro, Facer País; a malla, o magosto ou actividades polo Día dos Reis Meigos ou Entroido.
Recentemente tamén promoveu unha camiñada para a recollida de lixo na parroquia de Láncara, cun percorrido de 10 quilómetros, co fin de limpar a zona e concienciar ás persoas sobre a protección do medio ambiente.