O TSXG rexeita autorizar a construción de catro vivendas no Camiño de Santiago

A sección segunda do Tribunal Superior de Xustiza de Galicia (TSXG) rexeitou conceder a unha empresa autorización para construír catro vivendas unifamiliares encostadas en Sarria ao considerar que están proxectadas dentro do territorio histórico do Camiño de Santiago, declarado Ben de Interese Cultural, así como dentro do Convento da Mercé ou mosteiro da Magdalena, ben catalogado.

Segundo informa o TSXG, o tribunal subliña na sentenza que a parcela se atopa "dentro dos propios bens, non na contorna de protección do ben catalogado, nin na zona de respecto ou amortiguamiento do Camiño de Santiago".

Os xuíces avalan, xa que logo, a decisión da Xunta de non autorizar a construción das casas. Así, indican no fallo que, tal como expuxo a arquitecta autonómica, "o elemento protexido non só é a edificación, senón tamén o terreo asociado á mesma", á vez que advirten que "non é posible a construción de vivendas encostadas na leira dun convento".

O TSXG conclúe que existe "unha dobre protección: a derivada do Camiño de Santiago e a derivada da localización do mosteiro". Ademais, asegura que as casas "limitan e desfiguran a contemplación das perspectivas do conxunto urbano e das súas características históricas, alterando e danando gravemente a esencial configuración do ben e do territorio histórico do Camiño Francés".

"Ha de ser respectado a paisaxe urbana e o patrimonio arquitectónico e cultural, e non consta a autorización das obras de 2004 e 2007, de forma que non basta co cumprimento das normas urbanísticas para considerar que sexan obras compatibles co Patrimonio Cultural, ao ser ámbitos competenciais distintos", destaca o alto tribunal.