martes. 11.08.2020 |
El tiempo
martes. 11.08.2020
El tiempo

O TSXG ratifica o nomeamento do oficial da Policía Local

Sede do Tribunal Superior de Xustiza de Galicia. ADP
Sede do Tribunal Superior de Xustiza de Galicia. ADP
Un sindicato recorreuno por considerar que non cumpría co requisito de titulación

O Tribunal Superior de Xustiza de Galicia (TSXG) ratificou o nomeamento do oficial da Policía Local de Sarria, confirmando así unha sentenza do xulgado Contencioso-Administrativo número 1 de Lugo.

Un sindicato recorreu a este tribunal en 2018 por considerar que o oficial -designado no ano 2009- non cumpría co requisito de titulación esixido no concurso para cubrir a praza. Xa en 2015 e 2016 o colectivo presentara senllos escritos no Concello solicitando o inicio do procedemento de revisión de oficio e que se deixase sen efecto o nomeamento, aínda que sen obter resposta.


2020070318075131600
Sede da policía Local

A petición do sindicato foi rexeitada polo Contencioso-Administrativo de Lugo en 2019, polo que acudiu ao TSXG e este, con data do 22 de xuño, desestimou o recurso. Ademais, impúxolle as costas ata un límite de 1.000 euros. A sentenza pode ser recorrida ante o Supremo.

O colectivo pediu que se declarase nulo o nomeamento. Alegou que nas bases do concurso establecíase entre os requisitos dos aspirantes un curso da Academia Galega de Seguridade Pública, aínda que nunha sentenza de 2014 o TSXG declarou nulo que se pida esta formación e, polo tanto, ningunha convocatoria pode conter ese requisito.

Ante o recurso do sindicato, o Tribunal Superior de Xustiza sostén que o nomeamento do oficial fíxose "de conformidade coas disposicións normativas vixentes" no seu momento. Tras a sentenza do TSXG de 2014, "o requisito relativo ao curso de dispensa foi declarado nulo, o que determina que ningunha convocatoria pode conter ese requisito", aínda que o oficial "foi nomeado e tomou posesión cumprindo os requisitos legais vixentes nesa convocatoria", indica o tribunal no seu fallo.

Este tamén considera que as reclamacións do sindicato son claramente contrarias "á equidade, á boa fe e ao dereito dos particulares, dado o tempo transcorrido".

O nomeamento do oficial xa fora levado aos tribunais anteriormente, pois se recorreu o proceso selectivo. Con todo, tanto o Contencioso-Administrativo como o TSXG o desestimaron. Desta forma, son catro as sentenzas que avalan tanto o proceso selectivo como a designación do oficial e "reforzan" a este, sinalou o axente. "Todas estas denuncias partiron sempre dun mesmo sindicato, o cal nesta última fase", do 2016 ao 2018, "contou coa conivencia da máxima representante política", manifestou o oficial.

O TSXG ratifica o nomeamento do oficial da Policía Local
comentarios