O Tribunal Superior de Xustiza de Galicia (TSXG) estimou o recurso dos promotores dun hotel en Sarria e obriga á Confederación Hidrográfica do Miño-Sil (CHMS) a conceder autorización para a construción do aloxamento na Rúa Calvo Sotelo, no solar do antigo cuartel.
O organismo denegara o permiso por considerar que o solar se sitúa en zona de dominio público hidráulico cartográfico e, polo tanto, non se podía construír. Pola súa banda, os promotores defenderon que está en zona de policía e si podía levantarse.
A cualificación de dominio público afectaba a numerosas propiedades de Sarria na contorna do río Celeiro, situación descuberta por mor da problemática da licenza do hotel, o que levou a que o Concello reclamase á CHMS a revisión do plan hidrolóxico, petición que foi aceptada.
En xaneiro do pasado ano o organismo de conca denegou a autorización para construír o negocio porque as obras situaríanse en zona de dominio público cartográfico do Celeiro. Entón os promotores presentaron recurso de reposición acompañado dun informe no que negan que a parcela teña esta cualificación, senón de zona de policía. En abril a Confederación desestimou a reclamación e acudiron ao TSXG.
Este reprocha no seu fallo que, "fronte á profusión de datos do informe pericial achegado pola parte recorrente", o que sustenta a resolución da Confederación Hidrográfica "adoece de certo simplismo e non ofrece corroboración algunha dos resultados que nel se mantén".
O tribunal sostén que o solar non está en zona de dominio público nin de servidume, si na de policía de augas, polo que as obras son autorizables. "Precisamente é a falta de condición de dominio público da parcela o que determina o sustentado no informe, cuxo fondo a administración eludiu examinar e o que, en definitiva, mantense na demanda", explica. As determinacións da CHMS non son irrefutables e infalibles, afirma, pois admiten a proba en contrario, que "é o ofrecido polos recorrentes co informe achegado". "A falta de precisión do sistema cartográfico na delimitación do dominio público en relación co río pequeno resulta dunha circunstancia irrefutable, posta de relevo pola recorrente e no informe pericial", asegura o Tribunal Superior de Xustiza de Galicia, que tamén impuxo as costas procesuais á CHMS.
