O PSOE de Triacastela denunciou que o martes 31 o centro de saúde estivo sen médico e que os pacientes non foron atendidos ata este xoves, mentres que o Sergas alegou que puideron acudir a Samos.
O portavoz socialista, Carlos Gayo Tourón, explicou que o persoal médico está de vacacións e o martes non foi substituído por outro facultativo. Desde o Sergas responderon que contaban cun substituto, pero lle xurdiu "unha incidencia puntual de última hora" e non puideron cubrir a súa ausencia. Ese día estaban citados seis pacientes, aos que lles ofreceron acudir ao centro de Samos. Ademais, houbo unha urxencia, que "non revestiu gravidade", e o paciente foi a este ambulatorio.
O PSOE denunciou "os constantes recortes" que sofre Triacastela, cuxos veciños están "completamente abandonados" polos gobernos do PP da Xunta e do Concello.
Pola súa banda, o PP instou ao PSOE a pedir que o Goberno central leve a cabo o MIR extraordinario para contar con máis médicos. Ademais, invitouno a preocuparse "pola conxelación das pensións" anunciada por Pedro Sánchez.
