O Concello de Triacastela dedica 15.300 euros a axudas para microempresas e autónomos do municipio que se viron afectados pola crise do coronavirus, para as que acaba de abrir o prazo de solicitude.
A administración local puxo en marcha as subvencións ante a "grave crise económica" que supuxo a pandemia e que continúa a día de hoxe, polo que se precisa "impulsar a actividade económica" no concello "outorgando liquidez ás microempresas e ás persoas traballadoras autónomas e os seus negocios para que estes poidan sobrevivir". As subvencións son financiadas con cargo ao plan único deste ano da Deputación, aprobado polo pleno o 3 de abril.
O importe das axudas estará determinado polo número de solicitudes beneficiarias. Para optar a elas os establecementos deben acreditar unha baixada dos seus ingresos de polo menos un 30% no ano 2020 con respecto a 2019. A xustificación das perdas realizarase mediante a comparación entre o IRPF, declaración informativa de entidades en réxime de atribución de rendas ou impostos de sociedades, segundo cada caso.
Entre os requisitos tamén está que os solicitantes deben ser persoas físicas autónomas ou xurídicas, comunidades de bens, sociedades civís ou outras entidades sen personalidade xurídica. Non poden ter débedas con Facenda, a Seguridade Social e o Concello ou ben que estas non superen o 80% da axuda pedida e comprométanse a saldala en 15 días desde a recepción da subvención.
Os interesados dispoñen dun prazo dun mes para pedir as subvencións. O modelo de solicitude está dispoñible na sede electrónica do Concello e as oficinas municipais. Teñen que incluír tamén unha serie de documentación, segundo figura nas bases, publicadas este martes no Boletín Oficial da Provincia. Todo iso deben presentalo no rexistro xeral do Concello ou ben por vía telemática.
