A xunta directiva da Asociación de Municipios do Camiño de Santiago -colectivo que agrupa a un centenar de concellos de varias comunidades autónomas- reuniuse este luns en Sarria, onde trece alcaldes reivindicaron o papel do Camiño Francés como a ruta de peregrinación "con maiúsculas".
O encontro, presidido polo alcalde de Sarria, Claudio Garrido, contou coa participación dos rexedores de Logroño (Pablo Fermoso de Mendoza), Pamplona (Enrique Maya) e Castiello de Jaca (Álvaro Salesa), quen son, respectivamente, presidente e vicepresidentes desta asociación.
Acudiron tamén, en calidade de vogais, os alcaldes de Triacastela, San Andrés de Rabanedo (León), Frómista (Palencia), Belorado e Castrojeriz (Burgos), Nájera (A Rioxa), Sangüesa (Navarra) e Artieda (Aragón), así como a tenente de alcalde de Villafranca del Bierzo (León), concello este que se ocupa da tesourería. Escusou a súa presenza o rexedor de Jaca.
Os asistentes estiveron de acordo en axuntar esforzos para fortalecer e protexer o Camiño Francés como "o máis representantivo da antigüidade, Patrimonio da Humanidade, primeiro Itinerario Europeo e único declarado Ben de Interese Cultural".
Os asistentes aludiron tamén á internacionalización da ruta, que require "adaptarse ás novas canles de difusión"
"Temos que potenciar o Camiño Francés, reivindicar que este é o Camiño e traballar xuntos para que estea onde se merece", sinalou o alcalde de Pamplona.
Pola súa banda, o rexedor de Logroño debullou algúns dos obxectivos que se marca a AMCS de face ao ano 2020 e o próximo Xacobeo 2021, como a formación en materia de seguridade. Tras insistir en que o Camiño Francés é "seguro", incidiu na formación de axentes para avanzar nesa "vocación de servizo" ao peregrino.
Os asistentes aludiron tamén á internacionalización da ruta, que require "adaptarse ás novas canles de difusión", así como á importancia de aplicar criterios comúns en cuestións de sinalización ou mantemento. Ademais, quixeron "desterrar" a idea de que o Camiño Francés está masificado e fixeron fincapé no papel da AMCS como "altofalante de pequenos municipios" que teñen "unha chea de atractivos".
O alcalde de Sarria, concello que ocupa a secretaría da AMCS, abriu a xornada xunto a un retrato de Elías Valiña resaltando a tradición xacobea deste municipio e agradecendo a elección da vila para celebrar esta primeira reunión da nova directiva, á vez que avogou por defender os "valores patrimoniais, sociais e culturais" do Camiño Francés.
