Un tráiler levou por diante esta semana uns dez metros do muro de peche dunha parcela, ademais de encaixarse contra un poste da luz, na parroquia lancaresa de Trasliste. O suceso ocorreu nun tramo da estrada no que se suceden dúas curvas moi estreitas e pechadas, onde xa quedaron atrapados outros camións, aínda que sen provocar tantos danos como nesta ocasión.
Segundo explican os veciños, esta vía é cada vez máis frecuentada porque supón un atallo para enlazar coa autovía A-6 e máis desde que foi arranxada dentro dun proxecto de cooperación entre os concellos de Láncara e O Corgo.
A estrada parte de Vilaleo e pasa por Trasliste para saír a Santalla e Gomeán, reducindo o percorrido ata a autovía nuns 20 quilómetros. Os usuarios aseguran que, á altura da saída 479 da A-6, o propio sistema GPS sinala esta vía como o traxecto máis rápido para ir a Láncara.
Os veciños xa tiveron que remolcar en varias ocasións vehículos pesados que quedaron atrapados
O problema radica en que, ao chegar á parroquia de Trasliste, os condutores atópanse con dúas curvas pechadas nas que se estreita a calzada. Os coches pasan sen problema, pero non así os camións. Os veciños xa tiveron que acudir en varias ocasións a remolcar cun tractor vehículos pesados que quedaron atrapados, pero nunca ocorreu algo como o sucedido hai uns días.
Un tráiler que non logrou facer o xiro encaixouse cun poste e tirou un muro de pedra que pecha unha leira, de dous metros de alto. "No canto de parar seguiu para adiante e barrenou o que atopou", comentan os veciños. No lugar quedaron tamén esparexidos restos do camión, que continuou a marcha tras saír da zona de atasco.
O incidente produciuse a plena luz do día e unha testemuña tomou a matrícula do tráiler, comunicándolla ao Concello, o cal contactou coa empresa propietaria para que se faga cargo dos danos.
A estreiteza desta vía ao seu paso por Trasliste motivou unha solicitude do PP para que se sinalice co fin de evitar novos accidentes con vehículos pesados.
A solución definitiva pasaría polo ensanche da estrada neste punto.