O Servizo Galego de Saúde (Sergas) autorizou a ampliación ata catro dos días de extracción de sangue no centro de saúde de Sarria, de modo que a partir de este venres faranse tamén os venres. Ata a data as analíticas realizábanse só os luns, mércores e xoves.
Polo momento, non foi precisado se a medida será permanente, pero si se sabe que durará polo menos varios meses. Para este venres xa hai pacientes citados para facerse as analíticas.
O edil de servizos sociais e médico de profesión, Benjamín Escontrela, agradeceu a Sanidade que atendese esta demanda.
Este concelleiro foi o promotor dunha moción presentada conxuntamente por Camiña Sarria e Galicia Sempre, e apoiada no pleno por todos os grupos da corporación municipal, na cal se solicitaba ao Sergas a ampliación a cinco días da semana das extraccións de sangue no ambulatorio.
A petición baseábase no elevado número de pacientes que atende o centro de saúde de Sarria, cunha poboación de máis de 13.000 habitantes, o que facía que tres días de analíticas fosen "insuficientes". Ademais, outros concellos da comarca moito máis pequenos teñen dous días de extraccións de sangue á semana, de modo que non hai unha correlación entre o número de pacientes e o servizo que vén prestando, alegaban.
UNHA CARPA. Esta solicitude, que xa foi a pleno en decembro de 2020, volveu aprobarse en novembro de 2021 por unanimidade de todos os partidos. A mesma moción incluía, no entanto, outra demanda que non obtivo resposta, polo menos ata o momento. O pleno instaba tamén ao Sergas a que colocase algún elemento protector á entrada do centro de saúde ou ben que asumise, a partir do 1 de xaneiro deste ano, o custo da carpa instalada polo Concello en febreiro de 2021 e pola cal vén pagando desde entón un alugueiro de 834 euros ao mes.
Esta carpa resulta necesaria para evitar que os pacientes esperen á intemperie en condicións climatolóxicas adversas.
Unha media de 70 cada día
Lista de espera
A lista de espera, segundo as mesmas fontes, pode ser dun mes ou mes e medio.
