A Consellería de Infraestruturas da Xunta anunciou este luns que retomará nas próximas semanas as obras da senda peonil de Valdriz, no municipio de Láncara, unha vez obtida a autorización da Confederación Hidrográfica do Miño-Sil (CHMS), necesaria para a ampliación da plataforma da ponte situada nesta zona, na LU-621.
"Tampouco se poden retomar os traballos sen o retranqueo previo da liña eléctrica, condicionantes que coñece perfectamente o Concello de Láncara", engadiu.
Estas obras iniciáronse en outubro do pasado ano co movemento de terras e pararon á altura da ponte ao resultar "imprescindible" soterrar a liña de evacuación da hidroeléctrica de Valdriz. Segundo a Xunta, este foi un trámite "complexo" que requiriu varios permisos e un gasto adicional de 103.000 euros en concepto de indemnización á hidroeléctrica para que realizase o cambio da liña.
Este mes completouse o proceso coa renovación da autorización da CHMS, de modo que os técnicos da Axencia Galega de Infraestruturas e da empresa adxudicataria reuniranse para organizar o retranqueo da liña e a ampliación da ponte, "que se iniciará nas próximas semanas".
GOBERNO LOCAL. Desde o Concello esixiron á Xunta nas redes sociais a "continuación con carácter inmediato das obras". En caso de non facelo, advertían con levalo ante o pleno.
Pola súa banda, o portavoz do PP lancarés, Santiago Cubillas, pediu que se retomasen canto antes as obras porque son "necesarias" para os veciños. Con todo, entende as razóns do atraso.
Tamén, o popular pediu ao rexedor que se centre máis "nos proxectos locais que nos doutras administracións".
