Fontes da Garda Civil confirmaron que continúa aberta a operación para deter aos outros dous mozos que a pasada semana asaltaron unha vivenda unifamiliar na localidade lucense de Sarria e retiveron a dous menores, de 8 e 11 anos de idade, mentres rexistraban a casa para facerse con diñeiro en efectivo e obxectos valor.
A Garda Civil identificou e detivo a finais da semana pasada a un home de orixe dominicano, de 28 anos de idade, que foi quen supostamente alugou nun negocio do polígono industrial do Ceao –en Lugo capital– a furgoneta que empregou a banda para fuxir do lugar dos feitos.
De feito, o detido foi interceptado sete horas despois do asalto á vivenda, de madrugada, cando circulaba con ese mesmo vehículo por unha rúa de Lugo.
De momento, segundo explicaron a Efe fontes próximas á investigación, non se produciron novas detencións, aínda que a operación continúa aberta e, tras o rexistro domiciliario practicado no marco deste operativo, non se descartan por parte da Garda Civil novos arrestos nas próximas horas. O xulgado de Instrución de Sarria decretou o ingreso en prisión do único detido ata o momento.