A vila de Sarria acollerá a próxima semana talleres de manga e escritura, tres exposicións, concertos e contacontos na primeira Semana das Letras e a Lectura, organizada pola concellaría de cultura e igualdade.
O tema elixido é "Mulleres de conto", co que busca homenaxear ás mulleres que conforman o mundo da literatura infantil e xuvenil, desde os personaxes dos contos ata as autoras, editoras, ilustradoras, profesoras ou bibliotecarias.
Durante toda a semana, a casa da cultura acollerá tres exposicións -Pioneiras, Mulleres encantadas e Lectoras- sobre galegas que abriron camiño, retratos de mulleres singulares obra de alumnos da Universidade de Vigo e sobre mulleres lectoras vistas por distintos pintores.
Todos os días haberá actividades na casa da cultura abertas ao público
A iniciativa, que foi presentada onte en Sarria pola concelleira de cultura e igualdade, Mónica López, contará coa participación de todos os colexios e institutos do municipio. Os alumnos gozarán durante toda a semana de varios contacontos a cargo de Polo Correo do Vento, Anxo Moure e Saleta Fernández, un encontro coa escritora Ledicia Costas, un taller coa autora Eli Ríos e un concerto literario a cargo de Canela Cafuné.
Todos os días haberá actividades na casa da cultura abertas ao público. O luns e o martes celebrarase, ás 17.30 horas, un taller de manga a cargo de Idoia de Luxán. A actividade achegará aos participantes ao universo do cómic para crear as súas propias historias. Pola súa banda, o mércores, ás 17.30 horas, o autor sarrián Manuel Darriba impartirá un "obradoiro" de escritura. Os dous talleres están recomendados para persoas a partir de doce anos.
O xoves celebrarase, ás 11.30 horas, un contacontos baseado na obra A brétema de María Vitoria Moreno, á que se dedica o Día das Letras Galegas. Posteriormente desenvolverase un taller de plástica creativa con goma eva. O venres, ás 17.30 horas, Anxo Moure ofrecerá outro taller, mentres que o sábado, ás 11.30 horas, celebrarase un contacontos, seguido dun "obradoiro" creativo. A partir das 17.30 horas haberá un concerto a cargo de Magín Branco.
As actividades acabarán o domingo, cando, ás 11.30 horas, haberá un contacontos e a continuación un taller. Un espectáculo de monicreques pechará, ás 17.30 horas, a Semana das Letras e a Lectura, a cal terá continuidade. Todas estas iniciativas están dirixidas a un público familiar.
