As segundas xornadas de urbanismo de Sarria Planifik celebraranse os días 19 e 20 na casa da cultura e contarán coa intervención de cinco relatores.
A concellaría de urbanismo, que dirixe Silvia Vázquez, organiza o foro, de entrada libre. Nesta edición entregarase un diploma acreditativo ás persoas que se inscriban. Para iso o Concello abre este mércores o prazo, que finalizará na mañá do 19, explicou a edil. Poden apuntarse na web do Concello. Aquelas persoas que non se inscriban poderán acceder igualmente ao foro, o cal arrincará o 19, ás 16.30 horas, coa presentación.
O primeiro relatorio, que terá lugar ás 17.00 horas, correrá a cargo do alcalde de Allariz, Francisco García Suárez. O rexedor achegará aos asistentes o modelo territorial deste concello.
O arquitecto do Concello de Carballo, Alfredo Garrote Pazos, impartirá a segunda conferencia. Abordará a partir das 18.30 horas a influencia da achaiadura xeral na revitalización do municipio no que el traballa.
As xornadas retomaranse o día 20, ás 10.30 horas, cando intervirá o arquitecto sarrián Valerio González Somoza. Este é especializado en urbanismo e integrante do equipo Planificación TEC e membro do colectivo 1Aínda. Analizará as estratexias de abordaxe do espazo público no sistema urbano menor.
A arquitecta do Concello de Lugo, Susana Penedo Souto, e o xerente do proxecto Life, Boris Hinojo Sánchez, ofrecerán, ás 12.00 horas, o último relatorio, que se titulará Life Lugo+biodinámico. Sementando cidades sostibles. O foro pecharase cunha mesa redonda.
