O Concello de Sarria depositou no xulgado os 38.000 euros para frear o embargo da Casa dos Ulloa, segundo informou este mércores o goberno local. O tribunal condenou ao Concello a abonar esta contía ao propietario dunha nave da Rúa Formigueiros polas rendas de aluguer debidas entre agosto de 2016 e xullo de 2018.
O importe queda en depósito ata que a sentenza do tribunal sexa firme, pois a administración local recorreuna.
O caso remóntase ao pasado xullo, cando o xulgado de primeira instancia e instrución de Sarria condenou ao Concello a abonarlle ao dono da nave o aluguer de dous anos. Ante iso o propietario pediu en novembro a execución provisional da sentenza e, ao non serlle pagada a contía, o empresario demandou por vía xudicial a incautación de bens do Concello ata cubrir o importe reclamado.
Por iso, hai preto dun mes o tribunal decretou o embargo da Casa dos Ulloa, tamén coñecida como Casa das Arsenias. O edificio, de 338 metros cadrados, sitúase na Rúa Maior, en pleno Camiño de Santiago. Ao continuar sen pagarlle a contía, a pasada semana o propietario da nave solicitou que un perito valore o inmoble como paso previo á súa poxa pública. Este proceso quedará paralizado co abono dos 38.000 euros.
