Os ladróns actuaron en Sarria na noite do domingo ao luns, na cal asaltaron dous bares do centro urbano e apropiáronse dun coche que supostamente utilizaron para emprender a súa fuxida, o cal apareceu horas despois sen danos no Corgo.
O vehículo subtraído atopábase estacionado na saída da vila cara a Monforte e foi recuperado este luns pola mañá nuns terreos do Corgo. Segundo algunhas fontes, deixárono intacto xunto a unha leira na que quedaron esparexidos algúns dos efectos roubados de madrugada nos bares, o que leva a relacionar a autoría destes tres sucesos.
O primeiro establecemento hostaleiro no cal os ladróns fixaron o seu obxectivo atópase xunto á rotonda da Pontevella. Ás 3.45 horas soou a alarma e a súa propietaria puido comprobar que a porta fora forzada cunha panca e que tiña o cristal roto. Unha vez no interior, os cacos levaron o cambio que había na rexistradora (que a hostaleira deixou aberta) e a recadación do comecartos, empregando para iso un método similar ao usado nun roubo noutra localidade lucense.
O botín non está cuantificado, pero si se sabe que este luns era o día previsto para baleirar a máquina de xogos, feito que se supón que os ladróns coñecían.
Pouco despois, os autores dirixíronse cara a outro bar, na rúa Gran Vía -non lonxe do anterior-, cuxa porta de entrada tamén forzaron cunha panca, sen que chegase a soar a alarma. Nesta ocasión, apropiáronse do computador, deixando a pantalla rota no interior do negocio. Tamén se apoderaron de caixetíns da máquina comecartos, cuxo contido está pendente de valoración.
Os afectados por estes últimos sucesos formularon as correspondentes denuncias no cuartel da Garda Civil, que abriu unha investigación para identificar e deter aos autores.
Estes roubos son os primeiros que transcenden no que vai de ano no municipio de Sarria, que viviu un final de 2019 con múltiples casos de delitos contra o patrimonio pero que neste 2020 non rexistrara subtraccións.
