martes. 20.10.2020 |
El tiempo
martes. 20.10.2020
El tiempo

Rouban de madrugada nunha decena de garaxes en distintas rúas de Sarria

Un dos coches afectados. EP
Un dos coches afectados. EP
Os autores forzaron varios turismos para levar un botín escaso, aínda que os danos producidos por esta fechoría foron cuantiosos

Garaxes de edificios de Sarria foron obxectivo dos ladróns na noite do venres ao sábado. Entraron en polo menos sete ou oito estacionamentos para roubar en turismos, aínda que ao parecer o botín foi escaso e foron maiores os danos provocados nos automóbiles.

Esta onda de roubos afectou a inmobles de distintas rúas, como Formigueiros, Gran Vía ou Avenida de Becerreá. En cada un dos garaxes forzaron un ou dous vehículos, parece que elixidos ao azar, xa que non se decantaron por un modelo de automóbil. Seguiron o mesmo modus operandi, romperon os cristais dos coches e revolvéronos en procura de obxectos de valor.

É o caso dun edificio da Rúa Formigueiros, onde o autor ou autores accederon ao garaxe a través do ascensor. Segundo explica unha veciña, só poden baixar ao estacionamento os residentes con chave, polo que tiveron que rebentar o botón do montacargas. Cre que debían ter coñecementos de electrónica para facelo, posto que, ademais, non o deixaron inoperativo. Xa no aparcadoiro romperon o cristal dun turismo e revolveron todo, aínda que o propietario non notou que lle faltase algo. Tamén intentaron roubar noutro automóbil, pero parece que sen éxito.

Os veciños non ouviron ningún ruído e non se decataron do suceso ata a mañá do sábado, cando se atoparon cos danos no ascensor.

Os residentes neste inmoble están fartos ante os roubos, xa que no último mes tamén lles subtraeron dúas bicicletas. Unha delas estaba no cuarto de contadores e a segunda atopábase ancorada ao chan do garaxe. Ante estes furtos os veciños do edificio están preocupados.

Non é a primeira vez que garaxes de edificios da vila sarriá son obxectivo dos delincuentes. Hai tres anos tamén ocorreu unha onda de roubos. Naquel momento producíronse sobre unha ducia de subtraccións en aparcadoiros de distintos puntos do centro urbano.

Rouban de madrugada nunha decena de garaxes en distintas rúas de...
comentarios