A cafetería Refuxio da Pobra de San Xiao, situada no centro da capitalidade lancaresa, foi obxecto dun roubo perpetrado na noite do martes ao mércores, cun botín consistente en diñeiro en efectivo, botellas de bebidas alcólicas, paquetes de tabaco e décimos de lotería, todo iso valorado pola responsable do establecemento nuns 6.000 euros, incluídos os danos ocasionados polos ladróns.
A substracción foi cometida entre as dúas e as tres da madrugada, e descuberta pola camareira cando se dispuña a empezar a xornada ás sete da mañá.
Dúas persoas que se cubrían o rostro para evitar ser recoñecidas accederon ao local, na rúa Benigno Quiroga, por unha fiestra traseira, para o que forzaron un
a reixa cunha pata de cabra ou utensilio similar, abrindo un oco de pequenas dimensións polo que lograron coarse dentro.
Segundo explican no establecemento, unha vez no interior levaron o caixón da rexistradora, apoderándose duns "900 euros" en billetes e outra cantidade que rolda os 400 en moedas.
Tamén forzaron a máquina comecartos, onde calculan que podía haber "entre 1.200 e 1.500 euros". Do mesmo xeito, arrastraron a expendedora de tabaco ata o almacén e unha vez alí abrírona apropiándose de paquetes valorados en 800 "euros", ademais de 180 euros en moedas.
Segundo o relato das vítimas, o roubo non quedou aí senón que os autores tamén substraeron unhas "60 botellas" do almacén por importe de "750 euros" -elixindo as de maior prezo-, así como dez décimos de lotería.
No seu periplo polo interior do local incluso fixeron simulacro de apropiarse dunha cesta de Nadal de grandes dimensións, pero desistiron posiblemente debido ao seu gran peso e a dificultade que suporía sacala do bar.
UNHA HORA. Os autores da subtracción permaneceron ao redor dunha hora dentro da cafetería, por onde se moveron ao seu antollo durante ese tempo, facendo uso dun machete e un desaparafusador para forzar as distintas máquinas, sinalan as afectadas.
A responsable do negocio, que di presentar xa a correspondente denuncia ante a Garda Civil, estima que os ladróns ocasionaron danos no bar por importe de 1.500 euros o que, unido a todo o substraído, xeraría unhas perdas que se aproximarían aos 6.000.
O negocio, que o&mércores nbsp;puido atender ao público con certa normalidade, sufriu un roubo similar hai agora sete anos. Segundo a hostaleira, foi en outubro de 2013 cando os ladróns actuaron por primeira vez neste establecemento da Pobra utilizando un modus operandi similar, dado que entraron pola mesma fiestra da cociña que nesta última ocasión.
