SARRIA.A alcaldesa de Sarria, Pilar López Yáñez, denuncia que o Concello retirou «30 niños de vespa velutina durante todo o verán» ante o «abandono» da Xunta. «Todos os días temos varios avisos de niños localizados non municipio», asegura a rexedora.
A brigada de medio ambiente do Concello é a encargada de retirar estes niños coa «única axuda» proporcionada polo goberno galego para facer fronte a esta «praga» que, critican, limítase a dous «traxes e unha pértega». Desde o Concello aseguran que isto pon en perigo aos traballadores que, nos dous últimos anos, retiraron máis de 90 niños «sen formación nin información» sobre esta especie.
A alcaldesa afirma que a altura dos niños impídelles actuar en moitas ocasións e teñen que pedir axuda ao 112 que «só avisa os bombeiros en situación de emerxencia», é dicir, naqueles casos nos que o niño estea localizado nun espazo público, preto dun centro escolar ou deportivo ou se hai persoas alérxicas cerca.
López Yáñez recorda que a este problema súmase que «vos profesionais do parque comarcal de bombeiros están en folga, polo que algunhas veces tampouco poden vir axudarnos».
Deste xeito denuncia que o goberno autonómico, administración competente na retirada dos niños, «desentendeuse totalmente deste asunto» e engade que deixou todo en man dos municipios. «Reclamamos á Xunta de Galicia que deixe de mirar cara outro lado e tome as medidas oportunas para atallar este problema», afirma.
PRÓXIMO PLENO. O grupo municipal socialista levará a pleno en setembro unha moción sobre «o problema» da velutina elaborada polo PSOE provincial. Nela inclúense tres acordos nos que se insta ao goberno autonómico a declarar «praga» a avispa asiática, pídese ao Ministerio de Agricultura, Pesca e Alimentación que revise a estratexia estatal aprobada en 2014 e, ao mesmo tempo, póñase en coñecemento da Unión Europea a situación ambiental da provincia.
