O Concello de Láncara, a empresa adxudicataria do servizo de axuda no fogar e as traballadoras chegaron este martes a un acordo no conflito polo pago da quilometraxe, segundo anunciou o alcalde, Darío Piñeiro.
A firma abonará ás empregadas 0,19 euros por quilómetro e desde o seu propio domicilio, mentres que ata agora pagáballes 0,18 e desde a casa do primeiro usuario. A medida terá carácter retroactivo e abonaráselles a diferenza entre novembro -momento no que a empresa se fixo cargo do servizo- e abril en tres fraccionamientos. Isto é o que reclamaban as traballadoras, que se mobilizaron o día 26 e prevían tres novas concentracións.
O rexedor sinalou que desde o goberno xa estaban a negociar coa firma desde hai "tres ou catro meses" e "só faltaban flocos". "Sempre tivemos en conta ás traballadoras e tamén aos usuarios, que ninguén se acordou dos dereitos destes", manifestou.
Dixo tamén non entender por que se levou a cabo a protesta e insistiu en que foi "un tema político" ao formar parte da candidatura do BNG o enlace sindical das empregadas. O alcalde acusou tamén á oposición de non "dar unha solución, só criticar".
Tras alcanzarse o acordo, o portavoz do BNG, Iago Bande, asegurou que se recoñece "que as traballadoras tiñan razón nas súas demandas" e motivo para "queixarse e manifestarse". "É unha vitoria da unión e do compromiso que teñen elas co servizo", indicou o edil, quen considera que as empregadas, coa súa "dignidade e compañeirismo", deben servir como "lección de que xuntos podemos conseguir o que nos propoñamos como pobo".
Con respecto ás críticas do alcalde, afirmou que este se atopa "obsesionado co BNG". "Non sabemos se é porque os problemas que trouxo a privatización do servizo de axuda no fogar escapáronselle das mans ou porque xa recibiu algún dato das enquisas que se fixeron en Láncara", opinou.
Bande sinalou que o goberno "creou un problema" privatizando o servizo e acusouno de constantes "insinuacións sobre a pouca profesionalidade das traballadoras". "Darío, manifestarse por pagarlles menos por quilometraxe do que lles prometestes non é política, é dignidade", concluíu.
