A empresa adxudicataria das obras da Rúa Diego Pazos de Sarria comezou este martes a reformar o cruzamento desta rúa con Toleiro para ensanchar a calzada.
Esta actuación forma parte dos traballos de remodelación de Diego Pazos entre as interseccións da Avenida e A Ciguñeira. O cruzamento realizouse máis estreito do previsto no proxecto, o que provocaría dificultades ao camión do lixo para manobrar, segundo sinalou a pasada semana a alcaldesa.
Xa fora colocado o bordo da beirarrúa, o cal se retirou este martes. Posteriormente comezaron a repolo, aínda que retranqueado.
Nunha das marxes desta intersección haberá unha zona axardinada, no mesmo lugar onde ata hai pouco se levantaba unha palmeira. Esta foi retirada o pasado decembro por un guindastre e trasladada ao parque do Chanto.
A Rúa Diego Pazos disporá doutras zonas verdes. Na marxe dereita, entre o cruzamento da Avenida e as inmediacións de Toleiro, contará tamén con xardín. Pola súa banda, enfronte haberá dúas prazas de aparcadoiro. Prevíase unha máis, aínda que foi retirada ao ser pedido pola Xunta de Galicia por estar os estacionamentos nas inmediacións dun paso de peóns.
A rúa terá outra zona axardinada na marxe esquerda, entre o paso de peóns con Toleiro e a entrada do aparcadoiro do Froiz. No lado contrario prevense nove prazas de aparcadoiro -unha das cales é de minusválidos- e unha zona de carga e descarga. No tramo que resta, ata as inmediacións do cruzamento da Ciguñeira, a zona axardinada vai pola marxe dereita. Enfronte haberá seis prazas de aparcadoiro e carga e descarga.
Nos próximos días tamén está previsto que se leve a cabo na marxe esquerda da rúa unha proba para comprobar se evacúa ben a auga. Esta medida tómase despois de queixas de veciños e políticos pola inclinación das beirarrúas. A rexedora asegurou que, segundo os técnicos, a execución da obra non presenta ningún problema, aínda que se realizará a proba de evacuación de auga para maior tranquilidade dos veciños.
