A poxa do antigo hotel Fiz de Vilapedre (Sarria), situado na vella estrada de Nadela a Monforte (LU-546), quedou deserta despois de que non se presentase ningunha oferta polo inmoble, o cal foi valorado en 675.000 euros.
As instalacións foron sacadas a poxa polo xulgado de primeira instancia e instrución de Sarria porque unha entidade bancaria solicita a execución hipotecaria para reclamar unha débeda de 314.465 euros, así como outros 104.464 correspondentes a intereses e costas.
A poxa foi electrónica e realizouse a través do portal da Axencia Estatal Boletín Oficial do Estado. Para presentar as ofertas abriuse un prazo de 20 días, o cal finalizou na tarde do luns sen que houbese poxas.
O aloxamento, que tivo categoría de tres estrelas, levántase sobre unha parcela de 18.000 metros cadrados
Esta foi a segunda ocasión na que o inmoble saíu a poxa. No caso anterior houbo un ofertante, unha empresa, aínda que finalmente non abonou o importe. Ante iso perdeu o depósito (33.750 euros) -contía que se restou da débeda total, entregándolla ao banco- e o xulgado optou por volver sacar o inmoble a poxa.
O aloxamento, que tivo categoría de tres estrelas, levántase sobre unha parcela de 18.000 metros cadrados, na que hai zonas axardinadas e aparcadoiro. O edificio ten unha superficie total construída de 2.400 metros, nos que se distribúen unha vintena de habitacións, cafetería, restaurante, comedores, salóns de actos e reunións, cociña e almacéns, entre outras estancias.
