A asemblea que os socialistas sarriáns celebrarán este martes non servirá finalmente para votar a candidatura da actual alcaldesa, Pilar López, ás eleccións do próximo mes de maio. A dirección provincial do partido retirou este luns este punto da orde do día por non axustarse á normativa que marca o procedemento interna de elaboración de listas.
A convocatoria fora realizada pola executiva local do PSOE, que propón a Pilar López para repetir como alcaldable do partido. O pasado venres remitiu un escrito aos afiliados no municipio citándoos para este martes –ás 20.30 horas, en segunda convocatoria, na sede da agrupación– co fin de celebrar unha asemblea extraordinaria. Tres puntos figuran na orde do día: a preparación do pleno do próximo día 31, a aprobación se cabe da proposta da executiva local para que Pilar López Yáñez repita como candidata nas eleccións municipais deste ano e o debate sobre o estado das obras de remodelación da rúa Diego Pazos, coas "explicacións oportunas". Para rematar, consta o capítulo de rogos e preguntas.
Tras ter coñecemento desta convocatoria, a dirección provincial do partido tomou cartas e, na tarde deste luns, remitiu unha resolución aos afiliados sarriáns na que retira desta asemblea o segundo punto da orde do día, referente á aprobación da candidatura de Pilar López.
Segundo sinala, esta decisión prodúcese tras observar que non se axusta á normativa do procedemento de elaboración de candidaturas aprobado polo comité federal o 10 de novembro de 2018 nin tampouco ao regulamento de desenvolvemento dos estatutos federais do 17 de febreiro do pasado ano.
Polas competencias que lle corresponden, a secretaria de organización provincial acorda retirar ese punto da convocatoria.
Este medio non logrou contactar este luns nin coa alcaldesa nin co secretario de organización da executiva local para coñecer a súa versión sobre este extremo e os pasos que prevén dar agora.
NORMATIVA. Segundo diversas fontes, a convocatoria que lles chegou aos militantes sarriáns –estaban citadas 60 persoas– incumpriría a normativa interna do partido en varios aspectos. En primeiro lugar, a votación dunha candidatura electoral tería que ser un punto único na orde do día dunha asemblea, dixeron.
Ademais, debería someterse a criterio dos afiliados a lista completa e non só o alcaldable, engadiron. Ao tratarse dun municipio de menos de 20.000 habitantes, tamén tería que abrirse un prazo para presentación no seu caso de candidaturas alternativas, sempre que conten co aval de polo menos un 30% dos membros da agrupación local. Parece ser que, a maiores, non todos os afiliados do partido en Sarria recibiron a convocatoria coa antelación suficiente.
